استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ايەلى نۇكەنوۆانى ءولتىردى دەپ ايىپتالعان ەكس-مينيستر قۋاندىق بيشىمباەۆتىڭ سوتى بولۋدا، دەپ حابارلايدى “ادىرا” ۇلتتىق پورتالى.
سوتتا بيشىمباەۆتىڭ قىلمىسىن جاسىردى دەپ ايىپتالعان باقىتجان بايجانوۆتان جاۋاپ الىنۋدا. ول بايجانوۆ سالتاناتتىڭ سول كۇنى ەس-ءتۇسسىز جاتقانىن كورگەن.
ايتۋىنشا، بيشىمباەۆ نۇكەنوۆاعا ءجيى قول كوتەرەتىن.
«مەنىڭ قازاقى تاربيەم مەن مىنەزىم وزىمنەن الدەقايدا ۇلكەن بيشىمباەۆقا كەڭەس بەرۋگە، ولاردىڭ وتباسىلىق ومىرىنە، قارىم-قاتىناسىنا ارالاسۋعا مۇمكىندىك بەرمەدى»، - دەدى ول.
ەكس-ءمينيستردىڭ تۋىسى ءوز ءسوزىن مارقۇم قىزدىڭ وتباسى مەن جاقىندارىنا كوڭىل ايتۋدان باستادى.
ول 9 قاراشا كۇنى تاڭەرتەڭ گاستروتسەنترگە كەلگەندە بيشىمباەۆتىڭ ءتۇنى بويى جانجال شىعارىپ، الكوگولدىك ىشىمدىك ءىشىپ، سالتاناتتى تاعى دا سوققىعا جىققانىن بىلگەنىن ايتتى. بايجانوۆ ول كەزدە جاعدايدىڭ قانشالىقتى اۋىر ەكەنىن تۇسىنە الماعانىن باسا ايتتى.
"سالتاناتقا مۇنداي قاۋىپ ءتونىپ تۇرعانىن ەلەستەتە المادىم. مەن بۇل ءومىر مەن ءولىم ماسەلەسى دەپ ويلاعان ەمەسپىن. بۇل اقتالۋ ەمەس. مەن جاي عانا بايقامادىم، مەن شىنىمەن نە بولىپ جاتقانىن تۇسىنە المادىم. بۇل مەنىڭ كىنام، ەندى وسىعان قاتتى وكىنەمىن", - دەدى باقىتجان بايجانوۆ.
بايجانوۆ ساعات 9.30 شاماسىندا بيشىمباەۆتىڭ وزىنە تەلەفون سوعىپ، مەيرامحاناعا شاقىرعانىن ايتتى. كەلگەننەن كەيىن ول ەرلى-زايىپتى وتىرعان VIP-كابينكانىڭ ەسىگىن قاقتى. بايجانوۆتىڭ ايتۋىنشا، بيشىمباەۆتان ىشىمدىكتىڭ ءيىسىن سەزگەن، بىراق ول ەسىن بىلگەن، ول جالاڭاش دەنەسىنە قارا كوستيۋم كيگەن.
"مەن كابينكاعا كىرەيىن دەپ جاتقان كەزدە بۇرىشتاعى ديۆاندا وتىرعان سالتاناتتى كوزىمنىڭ قيىعىمەن بايقادىم. ونىڭ ۇستىندە الدى جارتىلاي اشىق قارا پلاشش بولدى، مەنىڭ پلاشش استىندا كيىم جوق ەكەنىن بايقاپ قالدىم. سالتاناتتىڭ سىرت كەلبەتى، دالىرەك ايتساق، ىشىندە كيىمى جوق جارتىلاي اشىق پلاشش مەنى تاڭعالدىردى. مەن بىردەن كوزىمدى باسقا جاققا بۇردىم. ارينە مەن وعان زەر سالىپ قاراي المادىم. سول ساتتە مەن سالتاناتتىڭ باسى تومەن سالبىراپ تۇرعانىن بايقادىم، سول سەبەپتى مەن ونىڭ سول جاق كوزىنىڭ ىسىنگەنى مەن قىزارعانىن بىردەن بايقامادىم، بەتى جاسىرىنىپ تۇردى", - دەدى ول.
بايجانوۆ بيشىمباەۆتىڭ سۇراۋىمەن وعان كورپە اكەلىپ بەرىپ، ەسىك الدىندا كۇتىپ تۇرعانىن ءتۇسىندىردى. سوسىن بيشىمباەۆ ونى ىشكە كىرۋگە شاقىرعان.
"سالتانات ءجيى جانە قاتتىراق تىنىستاپ جاتقانىن ەستىدىم، مەن ول جاي عانا ۇيىقتاپ جاتىر دەپ ويلادىم. شىنىمدى ايتسام، ول كەزدە مەن وعان اسا ءمان بەرمەدىم. بۇل مەنىڭ سەكەمدەنۋىمە سەبەپ بولمادى، ويتكەنى مەن ولاردىڭ ءتۇنى بويى ۇيىقتاماعانىن جانە ىشىمدىك ىشكەنىن بىلەتىنمىن. مەن ونى قاتتى شارشاعان دەپ ويلادىم. قازىر ءوز الاڭسىزدىعىم ونىڭ تەز تىنىس الۋىن شارشاۋ دەپ ويلاۋىما اكەلگەنىن ءتۇسىندىم", - دەدى ول.
ول بيشىمباەۆ ەكەۋى سالتاناتتى كوتەرگەنىن، سالتانات ورنىنان تۇرىپ جاتقاندا بايجانوۆتىڭ قولىن قىسقانىن ءتۇسىندىردى.
"ول باسىن ءسال كوتەردى، تىك ۇستادى دەۋگە بولادى. قولىمدى قاتتى قىستى. قازىر ويلاپ وتىرسام، مۇمكىن سول كەزدە سالتاناتكومەك سۇراعىسى كەلگەن شىعار، الدەبىر بەلگى بەردى مە ەكەن. بىلمەيمىن، مۇنى دا ويلاپ ءجۇرمىن. سول كۇنى سالتاناتتىڭ اۋىر ءحالىن تۇسىنە الماعانىما وكىنەمىن. ول جاعدايدىڭ اۋىرلىعىن جەتە باعالامادىم", - دەدى بايجانوۆ.
سوتتالۋشىنىڭ ايتۋىنشا، ول كەيىن مارقۇمنىڭ سول جاق كوزىنىڭ ءىسىنىپ، قىزارعانىن بايقاعان. بايجانوۆ كابينكادا تاس-تالقان بولىپ جاتقانىن كورگەندە ولاردىڭ اراسىندا تاعى ءبىر جانجالدىڭ بولعانىن تۇسىنگەنىن جانە بيشىمباەۆتىڭ سالتاناتقا ءجيى قول كوتەرىپ جۇرگەنىن بۇرىننان بىلگەنىن ايتتى.
سونداي-اق سوتتالۋشى بەينەباقىلاۋ كامەرالارىنان جازبالاردى ءوشىرىپ تاستاعانىن، بىراق ولاردا قىلمىس بەلگىلەرى بولۋى مۇمكىن دەپ ويلاماعانىن ايتتى. بايجانوۆ مۇنى باسقا قىزمەتكەرلەرگە سەنىپ تاپسىرۋى ءوزىنىڭ قىلمىستان حابارسىز بولعانىن دالەلدەيدى دەپ ەسەپتەيدى.
سوتتالۋشى بايجانوۆ ءوز جاۋاپتارىندا كۇندىز نۇكەنوۆاعا جەدەل جاردەم شاقىرۋدى ۇسىنعانىن، بىراق بيشىمباەۆ ونىڭ جاي ۇيىقتاپ جاتقانىن، كومەك قاجەت ەمەس دەگەنىن ايتتى.
بايجانوۆتىڭ ايتۋىنشا، كەشكە ول ءوز شەشىمىمەن جەدەل جاردەم شاقىرعان.
"ماعان بيشىمباەۆ تەلەفون سوعىپ، سالتاناتتىڭ تامىرى سوقپاي تۇرعانىن ايتىپ، تەز كەل دەدى. ەستىگەن سوزدەن شوشىپ كەتتىم دە، بىردەن ەكىنشى قاباتقا جۇگىردىم. كابينكادا ءبىرىنشى كورگەنىم بيشىمباەۆ سالتاناتتىڭ قولىن ۇستاپ تۇردى، تامىر سوعىسى جوق ەكەنىن ايتتى دا، مەنىڭ دە تامىر سوعۋىن تەكسەرۋىمدى ءوتىندى. تەكسەرەيىن دەپ ەدىم، بىراق انىقتاي المادىم، سەبەبى قاتتى قورقىپ، ءتىپتى ۇرەيلەنىپ تۇردىم دەۋگە دە بولادى. ەكىنشىدەن، مۇنداي ىستە مەندە تاجىريبە جوق. سوسىن دارىگەر دوسىم ەسىمە ءتۇستى دە، مەن وعان بىرنەشە رەت قوڭىراۋ شالدىم، تامىر سوعۋىن تابا الماعانىمدى ايتتىم، تامىر سوعىسىن دۇرىس تەكسەرىپ جاتىرمىن با دەپ سۇرادىم", - دەدى سوتتالۋشى.
بايجانوۆتىڭ ايتۋىنشا، جەدەل جاردەم ديسپەتچەرى نەمەسە ءوزىنىڭ تانىس دارىگەرى وعان مويىنداعى تامىر سوعۋىن تەكسەرۋگە كەڭەس بەرگەن. سالتاناتتىڭ موينىنداعى جاراقاتتى ول العاش سول كەزدە بايقاعان. ونىڭ ايتۋىنشا، بۇل كەزدە بيشىمباەۆ كورىپكەلمەن سويلەسىپ تۇرعان.
"ول نەگە جەدەل جاردەم شاقىرمايدى دەپ ويلادىم. سوندىقتان تەلەفونىمنان جەدەل جاردەمدى ءوزىم شاقىردىم، ءمان-جايدى ءتۇسىندىردىم، سودان كەيىن ديسپەتچەردىڭ نۇسقاۋىمەن 10-15 مينۋتتاي رەانيماتسيالىق شارالاردى جۇرگىزدىم", - دەيدى باقىتجان بايجانوۆ.
ەستەرىڭىزگە سالا كەتەيىك، باقىتجان بايجانوۆ قىلمىستى جاسىردى دەگەن كۇدىككە ىلىنگەن.
