مەملەكەت باسشىسى قاسىم-جومارت توقاەۆ جاپونيا پرەمەر-ءمينيسترى فۋميو كيشيداعا كوڭىل ايتۋ جەدەلحاتىن جولدادى، - دەپ حابارلايدى “ادىرنا” ءتىلشىسى.
مەملەكەت باسشىسى قاسىم-جومارت توقاەۆ جاپونيا پرەمەر-ءمينيسترى فۋميو كيشيداعا ەلدىڭ باتىسىنداعى نوتو تۇبەگىندە بولعان جەر سىلكىنىسى سالدارىنان قۇربان بولعاندارعا بايلانىستى كوڭىل ايتتى.
«ەلىڭىزدە ورىن العان جويقىن تابيعي اپات تۋرالى حاباردى وقىپ قاتتى قايعىردىم، ونىڭ سالدارىنان كوپتەگەن ادامدار قازا تاۋىپ، زارداپ شەكتى. سىزگە قازاقستان حالقىنىڭ جانە جەكە ءوزىمنىڭ اتىمنان كوڭىل ايتامىن. جاقىندارىنان ايىرىلعان وتباسىلار مەن زارداپ شەككەندەردىڭ تەزىرەك ساۋىعىپ كەتۋىن جانە حابارسىز كەتكەن ازاماتتاردىڭ وتباسىلارىنا امان-ەسەن ورالۋىن تىلەيمىن»، - دەلىنگەن جەدەلحاتتا.
ەستەرىڭىزگە سالا كەتەيىك، دۇيسەنبى، 1 قاڭتاردا جاپونيادا بىرنەشە جويقىن جەر سىلكىنىسى بولدى. ەكى ساعات ىشىندە ەلدىڭ باتىس جاعالاۋىندا يشيكاۆا جانە نيگاتا پرەفەكتۋرالارى ايماعىندا 29 جەر دۇمپۋلەرى تىركەلدى.
