25 قازان كۇنى ينتەرنەت وشىرىلمەيدى. بۇل تۋرالى قازاقستان رەسپۋبليكاسىنىڭ ىشكى ىستەر مينيسترلىگى ايتتى، دەپ حابارلايدى “ادىرنا” ۇلتتىق پورتالى Zakon.kz پورتالىنا سىلتەپ.
الەۋمەتتىك جەلىدە 25 قازان كۇنى ينتەرنەت وشىرىلەدى دەگەن اقپارات تارادى. ىشكى ىستەر مينيسترلىگى بۇل اقپاراتتى تاراتقان اۆتوردى ىزدەۋدە.
اقپارات شىندىققا جاناسپايدى. ىشكى ىستەر ورگاندارى جالعان حابارلاما تاراتۋشىنى ىزدەستىرۋ بويىنشا شارالار قابىلداپ جاتىر. قر ءىىم ازاماتتاردى ارانداتۋشىلىققا بەرىلمەۋگە شاقىرادى جانە قىلمىستىق كودەكستىڭ 274-بابىنا سايكەس كورىنەۋ جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلاتىنىن ەسكەرتەدى، - دەپ حابارلادى ۆەدومستۆودان.
ايتا كەتەيىك، 2023 جىلى 17 قازاندا الەۋمەتتىك جەلىدە پوليتسيا كولىكتەرىنىڭ كولونناسى تۇسىرىلگەن ۆيدەو تارادى.
قازاقستاننىڭ قۇقىق قورعاۋ ورگاندارى 25 قازانداعى ميتينگىگە دايىندالىپ جاتقانىن ايتادى. بۇل قاۋەسەتتەرگە قر ىشكى ىستەر ءمينيسترىنىڭ ورىنباسارى يگور لەپەحا تۇسىنىكتەمە بەردى. ول ەل اۋماعىندا قىزمەتى زاڭسىز "قازاقستاننىڭ دەموكراتيالىق تاڭداۋى" ەكسترەميستىك ۇيىمىنىڭ مۇشەلەرى كوپتى ميتينگىگە شىعۋعا شاقىراتىنىن اتاپ ءوتتى. ونىڭ ايتۋىنشا، ءىىم قدت مۇشەلەرىنە ەلىمىزدە ميتينگى وتكىزۋىنە رۇقسات بەرمەيدى.
