الماتى-قورعاس تاس جولىنداعى پەنوپلاستى الىپ، ماسەلەنى كورسەتكەن ءجۋرناليستىڭ ۇستىنەن “قازاۆتوجول” كومپانياسى ارىز تۇسىرگەن. بۇل تۋرالى باسى داۋعا قالعان جۋرناليست دياس نۇراقىن Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
“الماتى وبلىسى پوليتسيا دەپارتامەنتىنىڭ قىزمەتكەرى حابارلاستى. ءسىزدىڭ ۇستىڭىزدەن "قازاۆتوجول" ارىز ءتۇسىردى دەيدى. "مۇلىگىمىزدى قيراتتى" دەپ پوليتسياعا جۇگىرگەن ەكەن. وزدەرى ساپاسىز جول سالىپ، كۇنىنە جۇزدەگەن جۇرگىزۋشىنىڭ كولىگىن تالقانداپ جاتقاندارىن بىلە مە ەكەن بۇلار؟ ايتقانعا كونىپ، ايداۋعا جۇرمەيمىن دەدىم. قازاۆتوجولمەن سوتتاسۋعا دايىنمىن. الدىمەن ولار پەنوپلاستتىڭ مۇلىك ەكەنىن دالەلدەسىن. سوسىن پەنوپلاست پوليتسيا ارالاساتىنداي قىمبات دۇنيە بولسا، بەتونكانىڭ باسقا جەرلەرىندە نەگە جوق ەكەنىن ءتۇسىندىرسىن. قىسقاسى "قازاۆتوجول" مەن "سوعىس" ەندى باستالدى. پوپكورن كوبىرەك الىپ الىڭىزدار”، دەپ جازدى جۋرناليست.
ءجۋرناليستىڭ جازباسىنان كەيىن، “قازاۆتوجول” ۇك” اق وكىلەتتى ورگانعا ارىز-شاعىمدى مەردىگەر ۇيىم تۇسىرگەنىن ايتتى.
قازاقستان رەسپۋبليكاسىنىڭ قولدانىستاعى زاڭناماسىنا سايكەس تاپسىرىس بەرۋشىنىڭ مەردىگەردىڭ وپەراتسيالىق جانە شارۋاشىلىق قىزمەتىنە ارالاسۋعا قۇقىعى جوق، دەپ “قازاۆتوجول” ءجۋرناليستىڭ جازباسىنا پىكىر قالدىردى.
ايتا كەتەيىك، جۋرناليست دياس نۇراقىن 19 قازان كۇنى الماتى – قورعاس باعىتىنداعى كۇرەجولدىڭ ساپاسىز سالىنعانىن كورسەتىپ، الەۋمەتتىك جەلىگە ۆيدەو جاريالاعان. بەينەجازبادا جوعارى ساناتتى جول سانالاتىن اۆتوبەتوننىڭ قۋىسىن كومپانيا پەنوپلاستپەن جاماپ قويعانى ايتىلادى. كەيىن بۇل داۋلى بولىپ، وعان جاۋاپتى كومپانيا جۋرناليستكە ونلاين تۇرىندە قوقان-لوققى كورسەتەدى.
كەيىن قوقان-لوققى كورسەتكەن الماتى – قورعاس تاس جولىنىڭ ۋچاسكە باسشىسى مەحمەت شاحين “ادىرنا” ۇلتتىق پورتالىنا پىكىرىن بىلدىرگەن بولاتىن.
