جۋرناليست قىمبات دوسجان الەۋمەتتىك جەلىدە اناسىن ىزدەگەن جانىبەك تۋرالى جازبا جاريالادى، دەپ حابارلايدى "ادىرنا" ءتىلشىسى.
Instagram جەلىسىندە قىمبات دوسجان جانىبەكتىڭ اناسىن ىزدەۋ بارىسىندا تاعى ءبىر قىلمىستىڭ بەتى اشىلعانىن جازعان.
ء"بىز جانىبەكتىڭ اناسىن ىزدەپ ءجۇرىپ، 2004 جىلى قىلمىستىق قۇرامنىڭ دا بولعانىن ويلاماعان جەردەن انىقتادىق. نەگىزى قىلمىسكەر ەمەس، تۋعان اناسىن ىزدەپ ءجۇر ەدىك قوي. جانىبەكتىڭ قۇجاتىندا تۋعان اناسى دەپ جازىلعان ايەل 2023 جىلدىڭ جەلتوقسانىندا تابىلعان، بىراق بالا باسقا سياقتى (اۋىسىپ كەتكەن), ويتكەنى بىرنەشە دنق اناليز تەرىس شىقتى", – دەپ جازدى قىمبات دوسجان ءوز پاراقشاسىندا.
ءجۋرناليستىڭ پايىمداۋىنشا، بەلگيالىق جاني ساۆەلەۆتىڭ، ياعني قازاق بالاسى جانىبەك جۇماعۇلوۆتىڭ تۋعان اناسىن ىزدەۋ بارىسىندا بالالاردى ساۋدالاۋ بويىنشا قىلمىستىڭ بارى انىقتالعان.
قازىر قىلمىستىق كودەكستىڭ 135-بابى "كامەلەتكە تولماعاندار ساۋداسى" بويىنشا قىلمىستىق ءىس اشىلعان. سول بويىنشا ارقالىق قالاسىنداعى پوليتسيا باسقارماسىنىڭ تەرگەۋشىلەرى جۇمىس ىستەۋدە.
ودان بولەك جۋرناليست شەكارا اسقان قازاق بالاسىن اسىراپ العان بەلگيالىق ايەلمەن دە تىلدەسكەن.
ء"سوز اراسىندا «بالا اسىراپ العاندا زاڭ بۇزىلعان جوق پا؟» دەگەن دە سۇراق قويىلدى. ول كىسى «بەلگيا تاراپىنان زاڭ بۇزىلعان جوق» دەدى دە، قازاقستانعا قاتىستى ءبىر ادامنىڭ اتى-ءجونىن اتاپ، بالا اسىراپ الۋ ءۇشىن سول كىسىگە بالەنباي مىڭ ەۋرو بەرگەنىن، ءوز ەلىندە وتىرىپ جانىبەكتىڭ فوتوسى مەن مالىمەتىن العانىن، سودان كەيىن عانا جولعا شىققانىن مالىمدەدى. بۇل ديالوگ رەسمي تۇردە زاڭداستىرىلىپ، زاڭ ورگاندارىنا تاپسىرىلدى. جالپى جانىبەككە، تاستاندى بالالار تاعدىرىنا قاتىسى بولۋى مۇمكىن دەگەن ادامداردىڭ ءبارى قازىر بار، كوزى ءتىرى، بىلۋىمىزشە، تەك 1 مامان ومىردەن وتكەن. ءتىپتى مەديتسينا سالاسىندا 40 جىلعا جۋىق ەڭبەك ەتىپ كەلە جاتقان مامانداردىڭ دا جانىبەككە قاتىستى رەسمي قۇجاتتاردا اتى اتالعان، لاۋازىمى جازىلعان، قولى قويىلعان", – دەلىنگەن جازبادا.
كوپتەگەن ايەل سول جىلدارى جەكە باسىن كۋالاندىراتىن قۇجاتسىز بوسانىپ، قولحات جازىپ كەتىپ قالعان ەكەن.
"كەيبىرى قۇجاتىن كورسەتپەي، اتى-ءجونىن وتىرىك ايتقان. ءبىر ايەل ءوزى بوسانىپ، بالانى ەكىنشى ءبىر ايەلدىڭ اتىنا جازدىرىپ، پەرزەنتحانادا قالدىرعانىن بىلدىك. ارقالىقتىڭ پەرزەنتحاناسىن ءتۇرتىپ قالساڭ، ءبىر وقيعا ساۋ ەتە قالادى. وسىنىڭ بارىنە جول بەرگەن، ءوز ىسىنە سالعىرت قاراعان قىزمەتكەرلەر زاڭ الدىندا جاۋاپ بەرۋى كەرەك دەپ سانايمىز", – دەيدى قىمبات دوسجان.
