بۇگىن ءماجىلىس دەپۋتاتتارى «كەيبىر زاڭنامالىق اكتىلەرگە جول قوزعالىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى. بۇل قۇجات بويىنشا ەلەكتروساموكاتتار كولىك رەتىندە تانىلدى، - دەپ حابارلايدى "ادىرنا" پورتالى.
ەلەكتر سكۋتەرلەرىنىڭ قوزعالىسىن رەتتەۋگە ارنالعان تۇزەتۋلەردىڭ ءبىرىنشى پاكەتىنە سايكەس، ولاردىڭ قاتارىندا جىلدامدىعى ساعاتىنا 25 شاقىرىمعا دەيىن جەتەتىن كولىكتەر بار.
ەلەكتروساموكاتتار ۆەلوسيپەد جولدارى مەن جول جيەكتەرىندە، تروتۋارلاردا – جاياۋ جۇرگىنشىلەر اعىنىنىڭ جىلدامدىعىمەن ساعاتىنا 6 كيلومەتردەن اسپايتىن جىلدامدىقپەن شەكتەۋسىز قوزعالا الادى.
"ەلەكتروساموكاتتاردى جولدىڭ ءجۇرىس بولىگىنىڭ شەتكى وڭ جاق جولاعىمەن، ناقتىراق ايتساق ءبىر قاتارداعى اۆتوبۋس جولاعىمەن جۇرگىزۋگە رۇقسات ەتىلەدى. الايدا، بۇل ءۇشىن جۇرگىزۋشى 18 جاستا بولۋى كەرەك، ول بەكىتىلەتىن دۋلىعا مەن جارىق ساۋلەسىن تۇسىرەتىن كيىم كيۋى جانە كەز كەلگەن ساناتتاعى جۇرگىزۋشى كۋالىگى بولۋى ءتيىس»، - دەلىنگەن زاڭ جوباسىندا.
ەلەكتروساموكاتپەن جۇكتەر مەن جولاۋشىلاردى تاسىمالداۋعا تىيىم سالىنادى.
وسى تۇزەتۋلەرمەن تانىستىرعان دەپۋتات ەكاتەرينا سمىشلياەۆا اتاپ وتكەندەي، ولارعا جاڭا كولىكتەردىڭ – ەلەكتروسكۋتەرلەردىڭ، گيروسكۋتەرلەردىڭ، موتوتسيكلدەردىڭ قوزعالىسىن رەتتەۋ بويىنشا ازاماتتاردان ۇنەمى وتىنىشتەر ءتۇسىپ وتىرادى. بۇل ماسەلە اسىرەسە ءىرى قالالار ءۇشىن وزەكتى.
"كولىك جولى جانە جاياۋ جۇرگىنشىلەر جولىندا ەلەكتروساموكاتتاردىڭ قوزعالىسى جاياۋ جۇرگىنشىلەر مەن جۇرگىزۋشىلەر ءۇشىن قاۋىپتى. زاڭ جوباسى وسىدان ەكى جىل بۇرىن ازىرلەنگەن. الايدا ەلەكتروساموكاتتاردىڭ تەحنيكالىق رەگلامەنتى 2022 جىلدىڭ شىلدەسىندە عانا قابىلدانعان بولاتىن", - دەپ ءتۇسىندىردى سمىشلياەۆا.
سونداي-اق، دەپۋتاتتىڭ ايتۋىنشا، ولار اكىمدىكتەردىڭ قالا كەڭىستىگىن جوسپارلاۋعا قاتىسۋىن، سەرىكتەستىكتەردىڭ جاۋاپكەرشىلىگىن جانە كولىكتىڭ جاڭا ءتۇرىن تىركەۋدى قامتاماسىز ەتۋ ءۇشىن رەتتەۋ قۇرالدارىنىڭ ەكىنشى پاكەتىن دايىنداۋعا كىرىسكەن.
"ادىرنا" ۇلتتىق پورتالى
