اقتوبە وبلىسىندا جول جوندەۋگە بولىنگەن 70 ميلليون تەڭگەنى ۇرلاۋ ءىسى بويىنشا ۇكىمنىڭ كۇشى جويىلدى، دەپ حابارلايدى “ادىرنا” پورتالى “دياپازون" سايتىنا سىلتەپ.
«العاشىندا ەكى ايىپتالۋشى اقتالىپ، كەيىن ۇكىم بۇزىلىپ، ولارعا 6 جىل باس بوستاندىعىنان ايىرۋ جازاسى تاعايىندالدى، ال جاقىندا جوعارعى سوت قىلمىستىق كوللەگيا ۇكىمىن بۇزىپ، ءىستى جاڭادان سوت تالقىلاۋىنا قايتاردى»، - دەلىنگەن ماتەريالدا.
2019 جىلى «بازيس» جشس قوبدا-مارتۇق جولىن جوندەۋ بويىنشا تەندەردى جەڭىپ الدى. «دوسداناي» جشس مەردىگەرگە جۇمىس ءۇشىن قۇرال-جابدىقتار مەن ماتەريالداردى جەتكىزىپ بەردى. بۇل كومپانيانىڭ نەگىزىن قالاۋشى محيتار مانۋكيان مەن ديرەكتورى ميرجان ەسەنوۆ سوت وتىرىسىنا قاتىستى.
«مانۋكيان الاياقتىق جاساپ، وعان ەسەنوۆ كومەكتەستى، مەملەكەتكە 70 ميلليون تەڭگە شىعىن كەلتىرىلدى. ءبىرىنشى ساتىداعى سوت ءىس بويىنشا كوپتەگەن زاڭبۇزۋشىلىقتاردى انىقتاپ، قاتە تسيفرلارمەن ەسەپتەلگەن قۇرىلىسشىلارعا قوبدا-مارتۇق جولىن جوندەۋگە اسفالت پەن قاراجات جەتپەي، مەردىگەردىڭ كومەكشىلەرىنە زاڭسىز تۇردە بيۋدجەت اقشاسىن جىمقىردى دەگەن ايىپ تاعىلعان. سونىمەن قاتار، سوتتا جولاۋشىلار كولىگى جانە اۆتوموبيل جولدارى باسقارماسىنىڭ ەكس-باسشىسى مالىمبەت يبراشوۆ سمەتاعا شىنىمەن قاتە دەرەكتەر ەنگىزىلگەنىن، سول سەبەپتى كەيبىر جۇمىس تۇرلەرىن وزگەرتۋگە تۋرا كەلەتىنىن، مۇنىڭ ءبارى الدىن-الا تاپسىرىس بەرۋشى مەن مەردىگەر اراسىندا كەلىسىلگەنىن ايتتى»، - دەلىنگەن ايىپتاۋدا.
قىلمىستىق ىستەر جونىندەگى كوللەگيا سۋديالارى ءبىرىنشى ساتىداعى سوتتىڭ اقتاۋ ۇكىمىن بۇزىپ، «دوسداناي» كومپانياسىنىڭ ديرەكتورى مەن قۇرىلتايشىسى الاياقتىققا كىنالى دەپ تاۋىپ، 6 جىلعا باس بوستاندىعىنان ايىرىلدى.
«اڭگىمە مۇنىمەن بىتپەدى. سوت ۇكىمىنە كاسساتسيالىق شاعىم ءتۇسىرىلىپ، 70 ميلليوننىڭ ۇرلانعانى تۋرالى ءىستى جوعارعى سوت سۋديالارى قاراپ ۇلگەرگەن. ولار كۇتپەگەن شەشىمگە كەلدى. جوعارعى سوت وبلىستىق سوتتىڭ قىلمىستىق كوللەگياسىنىڭ قۇرامىندا بۇل ءىستى بۇرىن ادۆوكاتتىڭ مانۋكيانعا قاتىستى بۇلتارتپاۋ شاراسىن وزگەرتۋ تۋرالى شاعىمىن قاراعان سۋديا جۇرگىزگەنىن انىقتادى. بۇل سۋديانىڭ ءبىرىنشى ساتىداعى سوتتىڭ ۇكىمىنە اپەللياتسيالىق شاعىمدى قاراۋعا قاتىسقان سوت القاسىنىڭ قۇرامىندا بولۋعا قۇقىعى جوق. وسىنى نەگىزگە الا وتىرىپ، جوعارعى سوت اقتوبە وبلىستىق سوتىنىڭ ۇكىمىن بۇزىپ، سول ينستانتسياعا جاڭادان قاراۋعا قايتاردى»، - دەپ جازادى دياپازون.
