پرەزيدەنت قاسىم-جومارت توقاەۆ ۇكىمەتكە استانادا قازاقستان–قىتاي جاساندى ينتەللەكت مەكتەبىن اشۋ ماسەلەسىن پىسىقتاۋدى تاپسىردى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ ايتۋىنشا، ورتا ءبىلىم مەن جوعارى ءبىلىم اراسىندا ساباقتاستىق بولۋى قاجەت.
«جاڭا فورماتسيا ماماندارىن دايارلاۋدى ورتا بىلىمنەن ءبولىپ قاراۋعا بولمايدى. تومەننەن جوعارى قاراي ءبىرتۇتاس جۇيە بولعانى ءجون. وسى ورايدا، 18 جاسقا تولعان جاسوسپىرىمدەردىڭ مەكتەپ پارتاسىندا وتىرعانى قانشالىقتى دۇرىس دەگەن ورىندى ساۋال تۋادى. ادەتتە نازارباەۆ زياتكەرلىك مەكتەپتەرىندە جانە جەكەمەنشىك ءبىلىم وشاقتارىندا سولاي قالىپتاسقان. قازىرگى بالالار فيزيولوگيالىق تۇرعىدان تەز جەتىلەتىنىن ەسكەرسەك، بۇل قانشالىقتى اقىلعا قونىمدى؟»– دەدى ول بۇگىن تامىز كونفەرەنتسياسىندا.
قاسىم-جومارت توقاەۆ قىركۇيەك ايىندا جاساندى ينتەللەكت ۋنيۆەرسيتەتى اشىلاتىنىن ەسكە سالىپ، بۇل باعىتتاعى جۇمىستاردى ودان ءارى كۇشەيتۋ قاجەتتىگىن ايتتى.
«كونستيتۋتسيامىزدا جالپىعا بىردەي ءبىلىم بەرۋ ستاندارتى بەلگىلەنگەن. مۇنى مىندەتتى تۇردە ەسكەرۋ كەرەك.
قىركۇيەكتە جاساندى ينتەللەكت ۋنيۆەرسيتەتى اشىلادى. بىراق بۇل جەتكىلىكسىز دەپ ويلايمىن. ۇكىمەت قىتايدىڭ جاڭا تەحنولوگيالاردى مەڭگەرۋدەگى جەتىستىگى مەن تاجىريبەسىن ەسكەرە وتىرىپ، استانادا قازاقستان-قىتاي جاساندى ينتەللەكت مەكتەبىن اشۋ ماسەلەسىن پىسىقتاعانى ءجون»،– دەپ تولىقتىردى پرەزيدەنت.
