قازاقستان حالقىنىڭ 84 پايىزى نەسيەنى قارجىلىق ساۋاتسىزدىقتان ەمەس، ماجبۇرلىكتەن الىپ وتىر. بۇل تۋرالى ءماجىلىس دەپۋتاتى، ايتىسكەر اقىن رينات زايىتوۆ ايتتى، دەپ حابارلايدى «ادىرنا» ءتىلشىسى.
«قۇرمەتتى ۇكىمەت مۇشەلەرى!
بۇگىن «حالىقتىڭ شامادان تىس نەسيە الۋىن ازايتۋ جانە قارجىلىق ساۋاتتىلىقتى ارتتىرۋ تۋرالى» تاقىرىبىندا وتكەن پارلامەنتتىك تىڭداۋدا سۇراق قويۋىما ۋاقىت جەتپەدى، الايدا جينالىس سوڭىندا ءوز سۇراقتارىمىزدى جازباشا جولدايمىز دەپ كەلىسكەن ەدىك. سول سەبەپتى، مەن، ءوز سۇراقتارىمدى اشىق جولداپ وتىرمىن. سىزدەر وزدەرىڭىزدىڭ باياندامالارىڭىزدا «حالىقتىڭ شامادان تىس قارىزعا باتۋىنا قوعامنىڭ قارجىلىق ساۋاتتىلىعىنىڭ تومەندىگى سەبەپ بولىپ وتىر» دەدىڭىزدەر. مەن بۇل ويلارىڭىزبەن كەلىسپەيمىن. قازاقستان حالقىنىڭ 84 پايىزى تۇتىنۋشىلىق كرەديت الىپ وتىر دەگەن مالىمەت كەلتىردىڭىزدەر. بۇل قارجىلىق ساۋاتسىزدىق ەمەس، ماجبۇرلىكتەن بولىپ وتىر دەپ نەگە مويىندامايسىزدار؟
وسىعان دەيىن بىرنەشە رەت ايتقانداي حالىقتىڭ قازىرگى تابىسى نان-شايلىعىنا جەتپەيدى، سوندىقتان قاراپايىم قاجەتتىلىكتەردى وتەۋ ءۇشىن (كيىم-كەشەك، ءجۇرىس-تۇرىس ت.ب.) حالىق تۇتىنۋشىلىق نەسيە الۋعا ءماجبۇر. ويتكەنى، ولاردىڭ تاپقان ايلىقتارى مۇلدەم ءوز قاجەتتىلىكتەرىن ءتيىستى تۇردە وتەۋگە جەتپەيدى. ونىڭ دالەلىن وتكەندە ەسەپتەپ تۇرىپ الدارىڭىزعا كورسەتكەنمىن»،—دەدى دەپۋتات.
رينات زايىتوۆتىڭ ايتۋىنشا،
حالىقتىڭ قارىزعا باتۋىنىڭ تاعى ءبىر سەبەبى — نەسيە پايىزدىلىعىنىڭ تىم جوعارلىعى.
«نەگە سىزدەر ءوز جاۋاپكەرشىلىكتەرىڭىزدى مويىندارىڭىزعا الىپ، حالىقتىڭ شامادان تىس نەسيە الۋىنا ۇكىمەتتىڭ جۇمىسىنىڭ ناتيجەسىزدىگى دە سەبەپكەر ەكەندىگىن اشىپ كورسەتپەيسىزدەر؟ جانە دە نە ءۇشىن حالىقتىڭ ەڭ تومەنگى جالاقىسىن ارتتىرۋعا قۇلىقسىز بولىپ وتىرسىزدار؟ وعان نە كەدەرگى؟ ءبىزدىڭ حالىقتىڭ قارىزعا باتۋىنىڭ تاعى ءبىر سەبەبى — نەسيە پايىزدىلىعىنىڭ تىم جوعارلىعى. نەگە ماسەلەنى وسى جاعىنان قاراستىرىپ، نەسيە پايىزىن تومەندەتىپ، ارەكەت جاسامايسىزدار؟
حالىق ءوز كۇنىن ءوزى كورىپ جاتىر. شاعىن كاسىپ باستاۋ ءۇشىن تومەنگى پايىزدىق ولشەممەن، مىسالى ەكى نەمەسە ءۇش پايىزبەن نەسيەلەر نەگە بەرىلمەيدى؟ نە سەبەپتى ءالى كۇنگە دەيىن بۇنداي باعدارلامالار جاسالىنباي جاتىر؟
قۇرمەتتى ۇكىمەت مۇشەلەرى! قويىلعان سۇراقتارىما زاڭدا بەلگىلەنگەن مەرزىمدە جاۋاپ بەرۋلەرىڭىزدى سۇرايمىن»،—دەدى ول.
