Qazaqstan halqynyń 84 paıyzy nesıeni qarjylyq saýatsyzdyqtan emes, májbúrlikten alyp otyr. Bul týraly Májilis depýtaty, aıtysker aqyn Rınat Zaıytov aıtty, dep habarlaıdy «Adyrna» tilshisi.
«Qurmetti Úkimet músheleri!
Búgin «Halyqtyń shamadan tys nesıe alýyn azaıtý jáne qarjylyq saýattylyqty arttyrý týraly» taqyrybynda ótken Parlamenttik tyńdaýda suraq qoıýyma ýaqyt jetpedi, alaıda jınalys sońynda óz suraqtarymyzdy jazbasha joldaımyz dep kelisken edik. Sol sebepti, men, óz suraqtarymdy ashyq joldap otyrmyn. Sizder ózderińizdiń baıandamalaryńyzda «Halyqtyń shamadan tys qaryzǵa batýyna qoǵamnyń qarjylyq saýattylyǵynyń tómendigi sebep bolyp otyr» dedińizder. Men bul oılaryńyzben kelispeımin. Qazaqstan halqynyń 84 paıyzy tutynýshylyq kredıt alyp otyr degen málimet keltirdińizder. Bul qarjylyq saýatsyzdyq emes, májbúrlikten bolyp otyr dep nege moıyndamaısyzdar?
Osyǵan deıin birneshe ret aıtqandaı halyqtyń qazirgi tabysy nan-shaılyǵyna jetpeıdi, sondyqtan qarapaıym qajettilikterdi óteý úshin (kıim-keshek, júris-turys t.b.) halyq tutynýshylyq nesıe alýǵa májbúr. Óıtkeni, olardyń tapqan aılyqtary múldem óz qajettilikterin tıisti túrde óteýge jetpeıdi. Onyń dálelin ótkende eseptep turyp aldaryńyzǵa kórsetkenmin»,—dedi depýtat.
Rınat Zaıytovtyń aıtýynsha,
halyqtyń qaryzǵa batýynyń taǵy bir sebebi — nesıe paıyzdylyǵynyń tym joǵarlyǵy.
«Nege sizder óz jaýapkershilikterińizdi moıyndaryńyzǵa alyp, halyqtyń shamadan tys nesıe alýyna Úkimettiń jumysynyń nátıjesizdigi de sebepker ekendigin ashyp kórsetpeısizder? Jáne de ne úshin halyqtyń eń tómengi jalaqysyn arttyrýǵa qulyqsyz bolyp otyrsyzdar? Oǵan ne kedergi? Bizdiń halyqtyń qaryzǵa batýynyń taǵy bir sebebi — nesıe paıyzdylyǵynyń tym joǵarlyǵy. Nege máseleni osy jaǵynan qarastyryp, nesıe paıyzyn tómendetip, áreket jasamaısyzdar?
Halyq óz kúnin ózi kórip jatyr. Shaǵyn kásip bastaý úshin tómengi paıyzdyq ólshemmen, mysaly eki nemese úsh paıyzben nesıeler nege berilmeıdi? Ne sebepti áli kúnge deıin bundaı baǵdarlamalar jasalynbaı jatyr?
Qurmetti Úkimet músheleri! Qoıylǵan suraqtaryma zańda belgilengen merzimde jaýap berýlerińizdi suraımyn»,—dedi ol.
