قازاقستان مۇسىلماندارىنىڭ ءدىني باسقارماسى پالەستينادا بولىپ جاتقان قانتوگىسكە قاتىستى مالىمدەمە جاسادى، دەپ حابارلايدى «ادىرنا» ءتىلشىسى.
«ادامزات بالاسىن بىرلىك پەن يگىلىككە شاقىرعان پايعامبارلار ءىزى قالعان قاسيەتتى مەكەننىڭ بۇگىندە سوعىس الاڭىنا اينالىپ، مىڭداعان بەيكۇنا جانداردىڭ، اسىرەسە سابيلەر مەن بەيبىت تۇرعىنداردىڭ وققا ۇشىپ، قازا تابۋى بارشامىزدىڭ جانىمىزعا قاتتى باتۋدا. اۋىر جاراقات الىپ، ۇرەي قۇشاعىندا ءومىر ءسۇرىپ وتىرعان جانداردىڭ تەز ساۋىعىپ كەتۋىن تىلەيمىز»،—دەلىنگەن حابارلامادا.
ءدىني باسقارما تاراپتاردى بەيبىت كەلىسىمگە كەلۋگە جانە قانتوگىستى شۇعىل توقتاتىپ، حالىققا زارار كەلتىرمەۋگە شاقىرىدى.
«پالەستينا حالقىنىڭ حالىقارالىق كەلىسىمدەر مەن رەزوليۋتسيالاردا بەكىتىلگەن تاريحي قۇقىعىن قولدايتىندىعىن مالىمدەيمىز.
ەلىمىزدەگى بارشا مۇسىلمان قاۋىمىن قاسيەتتى مەكەننىڭ تىنىشتىعى مەن اماندىعى ءۇشىن دۇعا جاساۋعا شاقىرامىز. اللا تاعالا جەر بەتىن ءتۇرلى بۇلىكتەر مەن سوعىستان امان ەتكەي»،—دەپ جازدى قمدب-نىڭ ءباسپاسوز قىزمەتى.
