بۇگىن – قۇتقارۋشىلار كۇنى. بۇل ماماندىقتىڭ ابىرويى - ادام ءومىرىن ولىمنەن اراشالاپ قالاتىن عاجايىپ ىسپەن ولشەنەدى. بۇگىندە ءورت ءسوندىرۋ قىزمەتى سالاسىندا 6 جىلعا جۋىق قىزمەت ەتىپ، ادام ءومىرىن اراشالاپ جۇرگەن ءادىل ەركىنۇلىمەن اڭگىمەلەسىپ كوردىك.
ءادىل ەركىنۇلى – الماتى قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى، №1 مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى.
ءادىل مىرزا، بۇل سالاعا قالاي كەلدىڭىز؟
– اسكەري ماماندىقتى تاڭداۋ بالا كەزدەن ارمانىم. 2014 جىلى كوكشەتاۋ قالاسىنداعى اسكەري ينستيتۋتقا ءتۇسۋ ءۇشىن ۇبت تاپسىرىپ، وتە الماي، اسكەرگە كەتتىم. ءوزىم اعام اسكەري ادام بولعان سوڭ، قىزىعاتىنمىن. اسكەردەن كەلگەن سوڭ، «نابور» بولىپ جاتىر دەگەندى ەستىپ، قازىرگى ماماندىعىما وقۋعا ءتۇستىم. 2018 جىلى وسى سالا بويىنشا جۇمىسىمدى باستادىم. 6 جىل بولدى.
تىكەلەي ءوزىڭىز ادام ومىرىنە اراشا تۇسكەن كەزىڭىز بولدى ما؟
– ءيا بولدى. 2022 جىلى قاراشادا الماتى قالاسى، بوستاندىق اۋدانىندا (ناقتى مەكەنى ەسىمدە جوق) 2 جاسار قىزدى ءورتتىڭ ىشىنەن الىپ شىقتىم. سول كەزدە دەپۋتات ارداق نازاروۆ كورىپ، ءوزىنىڭ ينستاگرام پاراقشاسىنا سالعان. ناتيجەسىندە مەملەكەت باسشىسى ق.ج. توقاەۆتان «ەرلىگى ءۇشىن» مەدال الدىم.
بولىمشەدە نەشە ادام بار؟ ۇجىمداعى احۋال قانداي؟
– ۇجىم قاتتى ۇنايدى. تۋىپ وسكەن جەرىم تاراز قالاسى بولعان سوڭ، سول جاققا اۋىسۋعا بولاتىن ەدى. بىراق ۇجىم مۇشەلەرىن قيمايمىن. بارلىعى 17 قىزمەتكەر جۇمىس ىستەيمىز. بارلىعى جاقسى، تاربيەلى. ەكىنشى وتباسىمداي بولىپ كەتتى.
وتباسىڭىز جۇمىسىڭىزعا قالاي قارايدى؟
– ايەلىم مەنىمەن ماقتانادى. انام باسىندا قارسى بولعان «قاۋىپتى جۇمىس قوي، نەگە بۇل سالانى تاڭداپ جاتسىڭ. جازىم دەگەن تابان استىندا» دەپ. ايەلىم حالىققا قىزمەت ەتىپ، العىسىن الۋعا ءاردايىم قولداۋ كورسەتەدى. انام قازىر ءوز ويىن وزگەرتىپ، «وقى، كوتەرىل، ارمانىڭا جەت!» دەپ تىلەۋلەس بولىپ وتىرادى.
مەرەكە قارساڭىندا ارىپتەستەرىڭىزگە قانداي تىلەگىڭىز بار؟
ارىپتەستەرىمدى مەرەكەمەن قۇتتىقتايمىن. باتىلدىق پەن باتىرلىق، كەز كەلگەن جاعدايدا قۇتقارۋعا دايىن بولۋ – ءورت سوندىرۋشىلەردىڭ ەرەكشە قاسيەتى. بارىنە بەيبىتشىلىك، باقىت، وتباسىڭىز، قالاڭىز، ەلىڭىز ءۇشىن ءوز قىزمەتىڭىزدە ادال جانە باتىل بولۋدى تىلەيمىن! مەرەكە قۇتتى بولسىن!
اڭگىمەڭىزگە راقمەت!
دينارا بورانباي
«ادىرنا» پورتالى
