ۇلىبريتانيادا تۇراتىن قازاق ءجۋرناليسى، لوندوندا مەملەكەتتىك ارنا وكىلى بولىپ قىزمەت اتقاراتىن عالىمجان قارامانۇلى شەتەلدەگى ءومىرى، جۋرناليستىك قىزمەتى جانە قازاق تىلىنە دەگەن كوزقاراسى جايلى ءبولىستى، دەپ حابارلايدى "ادىرنا" ۇلتتىق پورتالى Sunqarnews-كە سىلتەپ.
عالىمجان قارامانۇلى ازىلمەن «16 جەردە جۇمىس ىستەيمىن» دەگەنىمەن، شىن مانىندە ول جۋرناليستيكا، مەديا كەڭەس بەرۋ جانە الەۋمەتتىك جەلى ارقىلى اقپارات تاراتۋ باعىتىندا ەڭبەك ەتىپ كەلەدى. ونىڭ ايتۋىنشا، لوندون سياقتى قىمبات قالادا وتباسىن اسىراۋ ءۇشىن ءتارتىپ، ماقسات جانە جاۋاپكەرشىلىك قاجەت.
«تاڭەرتەڭگى ساعاتىمدى دۇرىس بولسەم، كەشكە دەيىن بىرنەشە ءىستى تىندىرا الامىن»، – دەيدى ول.
Sunqarnews-كە بەرگەن سۇحباتىندا جۋرناليست شەتەلدە تۇرىپ جاتسا دا، بالالارىنىڭ قازاق ءتىلىن جەتىك مەڭگەرۋى وتباسىلىق تاربيە مەن تاباندىلىقتىڭ ناتيجەسى ەكەنىن ايتتى.
«ۇيدە تەك قازاق تىلىندە سويلەيمىز، ۇلتتىق داستۇرلەرىمىزدى ساقتايمىز. جۇبايىم ەكەۋمىز بالالارىمىزعا اعىلشىنشامەن قاتار قازاق تىلىندە سويلەتكىزۋدى باستى ماقسات ەتتىك. ۇيدە تەك انا تىلىمىزدە سويلەسەمىز، قازاقشا كىتاپتار وقيمىز، ۇلتتىق داستۇرلەرىمىزدى ساقتايمىز. بۇل – ءبىزدىڭ تامىرىمىزدى ۇمىتپاۋىمىزدىڭ بەلگىسى. بۇل جۇمىستىڭ ارتىندا ەڭبەك، شىدامدىلىق، كەيدە قاتالدىق تا تۇرادى. ويتكەنى وزگە ەلدىڭ ورتاسىندا بالانىڭ ءتىلى مەن مادەنيەتى تەز وزگەرەدى. بىراق وتباسىنداعى جىلى ورتا مەن ۇلتتىق قۇندىلىقتارعا دەگەن قۇرمەت ولاردىڭ ءتۇپ-تامىرىن ساقتاپ تۇرادى. ايدا، ءوزىڭ دە بىلەسىڭ، انگليادا قازاقشا ورتا جوق. بارلىعى اعىلشىن تىلىندە. ءتىپتى، ورىسشا دا سويلەيتىندەر جوقتىڭ قاسى. سوندىقتان ۇيدە انا تىلىمىزگە باستى نازار اۋدارامىز»، – دەيدى جۋرناليست.
سۇحبات بارىسىندا ول جۇبايىنا «پاتشايىم» دەپ ايتاتىنىن، بۇل ءسوزدىڭ استارىندا ۇلكەن قۇرمەت پەن العىس جاتقانىن جەتكىزدى.
«جۇبايىم — مەنىڭ تىرەگىم، جان جولداسىم. جۇمىس كوپ، شارشاعان كەزدەر بولادى، بىراق ۇيگە كەلگەندە ماعان دەمەۋ بولاتىن سول كىسى. مەنىڭ ءاربىر جەتىستىگىمنىڭ ارتىندا ونىڭ قولداۋى مەن سابىرى تۇر. “پاتشايىم” دەۋ قۇر ماقتاۋ ەمەس، شىن نيەتپەن ايتىلعان العىس. ويتكەنى ايەل ادام — وتباسىنىڭ جۇرەگى. وتباسى مىقتى بولسا، ەر-ازاماتتىڭ دا قادامى نىق باسىلادى. ونىڭ ۇستىنە ۇلىبريتانيادا تۇرامىز. بۇل جاقتا پاتشا جانۇياسى ءومىر سۇرەدى. ەكىنشى ەليزاۆەتا پاتشايىم ءومىرىنىڭ سوڭىنا دەيىن تاقتا وتىردى. سوسىن بار عوي – ەگەر جۇبايىمدى پاتشايىم دەپ ەركەلەتسەم، دەمەك ءوزىم دە وتباسىمداعى كىشىگىرىم پاتشامىن (كۇلەدى)»، – دەيدى ول.
سونىمەن قاتار، عالىمجان قارامانۇلى ماۋسىمدىق جۇمىسقا كەتىپ جاتقان قازاقستاندىق جاستار جايلى پىكىرىن ءبىلدىرىپ، ولاردىڭ اراسىندا الاياقتارعا تاپ بولعاندار از ەمەستىگىن اتاپ ءوتتى. شەتەلگە بارماس بۇرىن اقپاراتتى مۇقيات تەكسەرىپ، زاڭدى جولمەن ارەكەت ەتۋگە كەڭەس بەردى.
بۇگىندە ۇلىبريتانيادا جۇزدەگەن قازاق جاستارى ءبىلىم الۋدا. قازاق دياسپوراسى بەلسەندى جۇمىس ىستەپ، ۇلتتىق مەرەكەلەردى بىرگە اتاپ وتەدى.
اعىلشىن ءتىلىن 37 جاسىندا مەڭگەرە باستاعان عالىمجان قارامانۇلى جاستارعا ەشتەڭەدەن قورىقپاۋعا، ۇيالماۋعا كەڭەس بەرەدى.
«ءتىل بىلسەڭىز، الەمنىڭ كەز كەلگەن ەسىگى اشىلادى. قاي جەردە جۇرسەڭىز دە، ءوز تامىرىڭىزدى، شىققان جەرىڭىزدى ەستەن شىعارماڭىز. ارماندارىڭىز اسقاق بولسىن، جۇرەكتەرىڭىزدە وتانعا دەگەن ماحاببات وشپەسىن»، – دەپ اياقتادى ءسوزىن عالىمجان قارامانۇلى.
ۇقساس جاڭالىقتار
