Búgin – Qutqarýshylar kúni. Bul mamandyqtyń abyroıy - adam ómirin ólimnen arashalap qalatyn ǵajaıyp ispen ólshenedi. Búginde órt sóndirý qyzmeti salasynda 6 jylǵa jýyq qyzmet etip, adam ómirin arashalap júrgen Ádil Erkinulymen áńgimelesip kórdik.
Ádil Erkinuly – Almaty qalasy Tótenshe jaǵdaılar departamenti Órt sóndirý jáne avarııalyq-qutqarý jumystary qyzmeti, №1 mamandandyrylǵan órt sóndirý bóliminiń órt sóndirýshi-qutqarýshysy.
Ádil myrza, bul salaǵa qalaı keldińiz?
– Áskerı mamandyqty tańdaý bala kezden armanym. 2014 jyly Kókshetaý qalasyndaǵy áskerı ınstıtýtqa túsý úshin UBT tapsyryp, óte almaı, áskerge kettim. Ózim aǵam áskerı adam bolǵan soń, qyzyǵatynmyn. Áskerden kelgen soń, «nabor» bolyp jatyr degendi estip, qazirgi mamandyǵyma oqýǵa tústim. 2018 jyly osy sala boıynsha jumysymdy bastadym. 6 jyl boldy.
Tikeleı ózińiz adam ómirine arasha túsken kezińiz boldy ma?
– Iá boldy. 2022 jyly qarashada Almaty qalasy, Bostandyq aýdanynda (naqty mekeni esimde joq) 2 jasar qyzdy órttiń ishinen alyp shyqtym. Sol kezde depýtat Ardaq Nazarov kórip, óziniń ınstagram paraqshasyna salǵan. Nátıjesinde Memleket basshysy Q.J. Toqaevtan «Erligi úshin» medal aldym.
Bólimshede neshe adam bar? Ujymdaǵy ahýal qandaı?
– Ujym qatty unaıdy. Týyp ósken jerim Taraz qalasy bolǵan soń, sol jaqqa aýysýǵa bolatyn edi. Biraq ujym múshelerin qımaımyn. Barlyǵy 17 qyzmetker jumys isteımiz. Barlyǵy jaqsy, tárbıeli. Ekinshi otbasymdaı bolyp ketti.
Otbasyńyz jumysyńyzǵa qalaı qaraıdy?
– Áıelim menimen maqtanady. Anam basynda qarsy bolǵan «Qaýipti jumys qoı, nege bul salany tańdap jatsyń. Jazym degen taban astynda» dep. Áıelim halyqqa qyzmet etip, alǵysyn alýǵa árdaıym qoldaý kórsetedi. Anam qazir óz oıyn ózgertip, «Oqy, kóteril, armanyńa jet!» dep tileýles bolyp otyrady.
Mereke qarsańynda áriptesterińizge qandaı tilegińiz bar?
Áriptesterimdi merekemen quttyqtaımyn. Batyldyq pen batyrlyq, kez kelgen jaǵdaıda qutqarýǵa daıyn bolý – órt sóndirýshilerdiń erekshe qasıeti. Bárine beıbitshilik, baqyt, otbasyńyz, qalańyz, elińiz úshin óz qyzmetińizde adal jáne batyl bolýdy tileımin! Mereke qutty bolsyn!
Áńgimeńizge raqmet!
Dınara Boranbaı
«Adyrna» portaly
