استانادا ءورتسوندىرۋشى اسقار زابيكۋليننىڭ ءبيۋستى ورناتىلدى. بۇل تۋرالى استانا اكىمدىگى جاريالادى، دەپ حابارلايدى «ادىرنا» ۇلتتىق پورتالى.
استانا تجد مالىمەتىنشە، № 6 مامانداندىرىلعان ءورت ءسوندىرۋ ءبولىمىنىڭ اۋماعىندا ەرلىكپەن قازا تاپقان ەلوردالىق ءورت ءسوندىرۋشى اسقار زابيكۋليننىڭ قۇرمەتىنە ەسكەرتكىشتىڭ سالتاناتتى اشىلۋى ءوتتى.
ەسكەرتكىشتىڭ اشىلۋ شاراسىنا قازاقستان رەسپۋبليكاسىنىڭ توتەنشە جاعدايلار ءمينيسترى سىرىم ءشارىپحانوۆ، ەلوردا اكىمى جەڭىس قاسىمبەك، گارنيزون باسشىلىعى مەن جەكە قۇرامى، ازاماتتىق قورعاۋ ورگاندارىنىڭ ارداگەرلەرى، اسقاردىڭ تۋىستارى مەن جاقىندارى قاتىسقان.
ء"اربىر ادامنىڭ ءومىرى باعا جەتپەس قۇندى، مەملەكەتتىڭ ستراتەگياسى ەڭ الدىمەن ازاماتتاردى قورعاۋعا، توتەنشە جاعدايلاردىڭ الدىن الۋعا جانە جويۋعا باعىتتالعان. سول سەبەپتى قۇتقارۋشىلار مەن ءورت سوندىرۋشىلەردىڭ ەڭبەگى اسا ماڭىزدى بولىپ تابىلادى. بۇل ەسكەرتكىش – اسقاردىڭ وجەتتىگىنىڭ، جانقيارلىعى مەن ادالدىعىنىڭ بەلگىسى. بۇگىن ءبىزدىڭ كوڭىلىمىز ءتۇسىپ قايعىرىپ، سونىمەن قاتار، بارلىعىمىز ءۇشىن ۇلگى بولاتىن ەرلىككە دەگەن شەكسىز قۇرمەتپەن پەن تاڭدانۋعا كۋا بولىپ تۇرمىز. ونىڭ جاساعان ەرلىگى ازاماتتارىمىزدىڭ قاۋىپسىزدىگى جولىنداعى كۇرەستە بىزدەرگە كۇش پەن قۋات بەرەتىن ۇلگى بولسىن. اسقار زابيكۋلين ءبىزدىڭ ارىپتەسىمىز عانا ەمەس، سۇيىكتى ۇل، جار جانە اكە بولدى جانە ونىڭ ومىردەن ءوتۋى ءبىزدىڭ جۇرەگىمىزگە جازىلماس جارا سالدى. ءبىز ونى ارقاشان ەڭبەكقور، اقىلدى جانە سۇيىسپەنشىلىككە تولى ادام رەتىندە ەستە ساقتايمىز", - دەدى سىرىم ءشارىپحانوۆ ءوز سوزىندە.
ەسكەرتكىش تاقتادان اق جامىلعىنى الىپ تاستاعاننان كەيىن، جينالعاندار مەموريالعا گۇل شوقتارىن قويىپ، ءبىر مينۋت ۇنسىزدىكپەن ەسكە الدى.
بيىكتىگى ءۇش مەتر بولاتىن ەسكەرتكىشتە اسكاردىڭ ءبيۋستى قولادان، ال تومەنگى بولىگى ءمارماردان جاسالعان.
پوسموترەت ەتۋ پۋبليكاتسيۋ ۆ Instagram
«ادىرنا» ۇلتتىق پورتالى
