شىمكەنتتىك ەكى اعايىندى شەتەلدىكتەردى ۇرلاپ، قۇلدىققا جۇمسادى دەگەن كۇدىككە ءىلىندى، دەپ حابارلايدى "ادىرنا" ۇلتتىق پورتالى. بۇل تۋرالى قر ءىىم تجك ءباسپاسوز قىزمەتى جازدى.
«ءتارتىپ ساقشىلارى كىرپىش زاۋىتىنىڭ ءۇش يەسىن، شىمكەنت قالاسى مەن تۇركىستان وبلىسىنىڭ تۇرعىندارىن ۇستادى. ولاردىڭ ەكەۋى اعايىندى. ءتىنتۋ كەزىندە جەدەل قىزمەتكەرلەر ەكى زاۋىتتىڭ اۋماعىنان 60-تان استام شەتەلدىكتى تاپتى، ولاردىڭ بارلىعى وزبەكستان ازاماتتارى»، - دەلىنگەن حابارلامادا.
14 قازاندا الماتى پوليتسياسىنا اقتوبە وبلىسىنىڭ تۇرعىنىنان حابارلاما كەلىپ تۇسكەن. ايەل وزبەكستان ازاماتى ءارى ءوزىنىڭ اعاسى شىمكەنتتەگى ەڭبەك قۇلدىعىنان قاشىپ، الماتىعا كەلگەنىن ايتتى. بۇعان دەيىن پوليتسەيلەر كۇدىكتىلەرگە قاتىستى شەتەلدىكتەردەن ءۇش مالىمدەمە العان.
پوليتسەيلەر زاۋىتقا جۇمىسقا شەتەلدىكتەردىڭ شاقىرىلعانىن انىقتادى. سودان قۇجاتتارىن الىپ، جالاقىلارىن بەرمەي، مەزگىل-مەزگىل فيزيكالىق كۇش كورسەتىپ، تاياق جەيسىڭ دەپ قورقىتقان.
كۇدىكتىلەر قاماۋدا وتىر. قازاقستان رەسپۋبليكاسى قىلمىستىق كودەكسىنىڭ ەكى بابى: 126 «ەڭبەكتى قاناۋ ماقساتىندا باس بوستاندىعىنان زاڭسىز ايىرۋ» جانە 389 «وزبىرلىق» بويىنشا سوتقا دەيىنگى تەرگەۋ جۇرگىزىلۋدە.
25 شەتەلدىك جۇمىسشى قازىر «سانا سەزىم» ۇكىمەتتىك ەمەس ۇيىمىنىڭ قاراۋىندا بولسا، 30-دان استام ازامات جەكە باسىن كۋالاندىراتىن قۇجاتتارىنىڭ جوقتىعىنان قابىلداۋ بولىمىنە ورنالاستىرىلعان.
