رەسپۋبليكا كۇنى قارساڭىندا شىمكەنت قالاسىندا قازاقستاننىڭ ۇلتتىق مەرەكەسىنە ارنالعان سالتاناتتى ءىس-شارا ءوتتى. مەرەكەلىك كەشكە قالا اكىمى عابيت سىزدىقبەكوۆ، مەملەكەتتىك ورگانداردىڭ، قوعامدىق ۇيىمداردىڭ وكىلدەرى مەن ەڭبەك ۇجىمدارىنىڭ مۇشەلەرى قاتىستى.
قالا اكىمى كوپشىلىكتى رەسپۋبليكا كۇنىمەن قۇتتىقتاپ، كاسىبي قىزمەتىندە ەرەكشەلەنگەن، ەلدىڭ دامۋىنا ەلەۋلى ۇلەس قوسقان ازاماتتارعا قازاقستان رەسپۋبليكاسى پرەزيدەنتىنىڭ اتىنان مەملەكەتتىك ناگرادالار تابىستادى.
مەگاپوليس باسشىسى مەرەكەنىڭ تاريحي ماڭىزىنا توقتالىپ ءوتتى. 1990 جىلعى 25 قازاندا مەملەكەتتىك ەگەمەندىك تۋرالى دەكلاراتسيانىڭ قابىلدانۋى قازاقستان مەملەكەتتىلىگىنىڭ قالىپتاسۋىنداعى ماڭىزدى كەزەڭ بولىپ، ەلىمىزدىڭ تاۋەلسىزدىككە قاراي جاساعان قادامدارىنا جول اشتى.
«بيىل بۇل مەرەكە قازاقستاننىڭ جاڭا تاريحي بەلەسى – تاۋەلسىزدىكتىڭ 35 جىلدىعىمەن تۇسپا-تۇس كەلىپ وتىر. ەگەمەندىك پەن ەلدىكتىڭ نەگىزدەرىن ساقتاۋ جانە نىعايتۋ – ارقايسىمىزدىڭ ورتاق مىندەتىمىز»، – دەدى عابيت سىزدىقبەكوۆ.
قالا اكىمى، سونىمەن قوسا، ەلىمىزدە جالپى ۇلتتىق رەفەرەندۋم قورىتىندىسى بويىنشا قابىلدانعان جاڭا كونستيتۋتسيا نەگىزىندە ساياسي جانە قوعامدىق جاڭارۋ ۇدەرىستەرى جالعاسىپ جاتقانىن اتاپ ءوتتى. اتا زاڭ مەملەكەتتىك باسقارۋ جۇيەسىن جەتىلدىرۋگە، ادىلدىك پەن زاڭ ۇستەمدىگىن نىعايتۋعا نەگىز بولدى.
شىمكەنتتىڭ دامۋى تۋرالى ءسوز قوزعاعان قالا اكىمى مەگاپوليستىڭ جەتىستىكتەرىنە تۇرعىنداردىڭ قوسىپ وتىرعان ۇلەسىنىڭ ماڭىزىن اتاپ ءوتتى. بۇگىندە قالانىڭ ەكونوميكالىق الەۋەتى ارتىپ، ينۆەستيتسيالار جۇمىلدىرۋدا، ينفراقۇرىلىمدى جەتىلدىرىپ، ءبىلىم، مادەنيەت جانە سپورت سالالارىنداعى مۇمكىندىكتەرى كەڭەيىپ كەلەدى. بۇل باعىتتار حالىقتىڭ ءومىر ءسۇرۋ ساپاسىن ارتتىرۋعا جانە قالانىڭ ودان ءارى دامۋىنا ىقپال ەتەدى.
سالتاناتتى ءىس-شارا «بۇگىنگى قازاقستان» اتتى مۋزىكالىق-تەاترلاندىرىلعان قويىلىممەن جالعاسىپ، مەرەكەلىك كونتسەرتتىك باعدارلامامەن قورىتىندىلاندى.
