الماتى كوشەلەرىندە زيگزاگ ءتارىزدى جاڭا جول بەلگىسى پايدا بولدى. بۇل تۋرالى الماتى قالاسى اكىمدىگىنىڭ ءباسپاسوز قىزمەتى مالىمدەدى، دەپ حابارلايدى «ادىرنا» ۇلتتىق پورتالى.
ءباسپاسوز مالىمەتىنشە، ەرەكشە يرەك سىزىق تىلەنديەۆ كوشەسىندە پايدا بولدى.
جاياۋ جۇرگىنشىلەر جولاعىنىڭ الدىنداعى يرەك تاڭبا شەتەلدە بولعان جۇرگىزۋشىلەرگە تانىس بولۋى مۇمكىن. سىرت ءپىشىنى كوزگە ۇيرەنشىكتى ءبولۋ جولاقتارىنان وزگەشە. ول جولاقتىڭ تارىلعانىن كورسەتىپ، جاياۋ جۇرگىنشىلەر وتكەلىنە جاقىنداپ قالدى دەگەندى ەسكەرتەدى.
جول ەرەجەسىندە بۇل تۋرالى نە جازىلعان؟
سارى زيگزاگ ازىرگە سىناق رەجيمىندە تىلەنديەۆ كوشەسىنىڭ ابايدان تولە بيگە دەيىنگى بولىگىنە سىزعان. سول سەبەپتى جول ەرەجەسىندە بۇل بەلگى تۋرالى مالىمەت تە، ونىڭ سيپاتتاماسى دا جوق. وزگە ەلدە بۇل سىزىقتى دا كەسىپ وتۋگە تىيىم سالىنعان. ياعني بۇل جەردە ەكىنشى كولىكتى باسىپ وزۋعا نەمەسە جاياۋ جۇرگىنشىنى قاعىپ كەتۋدىڭ الدىن الۋ ءۇشىن ەكىنشى سىزىققا اۋىسۋعا بولمايدى. قازاقستاندا رەسمي كۇشىنە ەنبەگەندىكتەن، بۇل تاڭبانى باسىپ وتكەن جۇرگىزۋشىلەر ايىپپۇل تولەمەيدى.
ەگەر بەلگى كولىك اپاتىنىڭ ازايۋىنا اسەر ەتسە، ونى ەرەجەگە ەنگىزىپ، قالا جانە ەل اۋماعىندا قولدانادى. دەسە دە سىناقتان ءوتىپ جاتقان ايماقتا قانشا جاياۋ جۇرگىنشىنى كولىك قاققانى تۋرالى ستاتيستيكالىق مالىمەت جوق.
ايتا كەتەيىك، الەمدەگى كوپ مەملەكەتتە بۇل تاڭبانى قولدانۋ ونىڭ ءتيىمدى ەكەنىن كورسەتتى. بۇلار كەي جەردە جول بەلگىسىنەن ارتىق. بىراق بەلگى مەن تاڭبادان بولەك جاياۋ جۇرگىنشىلەر قاتىسقان اپاتتى ازايتۋ ءۇشىن تاۋلىك بويى وتكەل مەن ونداعى ادامداردىڭ كورىنۋىن جاقسارتۋ كەرەك. جولداعى تاڭبا كەي تۇستا بەلگىدەن دە انىق كورىنىپ تۇرعانى ابزال. سوندا جۇرگىزۋشى جىلدامدىقتى ازايتىپ، كەنەت ادام شىعىپ قالسا دايىن بولادى.
«ادىرنا» ۇلتتىق پورتالى
