بۇگىن “قاسىرەتتى قاڭتار وقيعاسىنا” تۋرا 1 جىل

4361
Adyrna.kz Telegram

بۇگىن “قاسىرەتتى قاڭتار وقيعاسىنا” تۋرا 1 جىل. بىلتىر 4-قاڭتار كۇنى قازاق قوعامىن ءدىر سىلكىندىرگەن، قارا جامىلدىرىپ، بيلىككە سىناق بولعان ايرىقشا جاعداي ورىن الدى. تاۋەلسىزدىك بەسىگى سانالاتىن الماتى قالاسى شاھار تاريحىندا بولماعان بۇلىنشىلىكتىڭ استىندا قالدى.

قۇربان بولعان بەيكۇنا سابيلەر، بالاسىنان ايىرىلعان انالار، اكەسىنەن ايىرىلعان بالالار. حالىقتىڭ ءۇنىن بيلىككە جەتكىزەمىز دەپ بەيبىت شەرۋگە شىققان جانداردىڭ وققا ۇشۋى، تەرگەۋگە الىنىپ، قامالىپ، بەتىنە ۇتىك باسىلىپ، ازاپتالۋى...

نارازىلىق جاڭاوزەننەن باستالىپ، كەيىن بىرنەشە ايماقتا جالعاسىن تاپتى. ەڭ سوراقىسى - شەرۋ الماتىدا دا ورىن الىپ، قالا تۇگەلدەي قارا جامىلدى. قالا قيرادى، اكىمدىك عيماراتى ورتەندى، دۇكەندەر تونالدى. 

نارازىلىق شەرۋى 1-قاڭتاردان باستالىپ، 4-قاڭتار كۇنى ناعىز شيەلىنىسكە اينالدى. بۇكىل قازاقستان بويىنشا ميتينگىلەرگە قاتىسۋشىلار سانى كۇرت ارتىپ، 37 مىڭعا جەتتى. اتىراۋ وبلىسىندا تەڭىزشەۆرويل كومپانياسىنىڭ جۇمىسشىلارى جۇمىسىن دوعارىپ، ءونىم شەتەلگە اكەتىلمەۋى ءۇشىن اۆتوتراسسا مەن تەمىرجولدى جاپتى. اتىراۋ، اقتوبە وبلىستارىندا وزگە كەن ورىندارىن دا ەرەۋىلدەر تولقىنى باستى. قاراعاندى وبلىسىندا "ارسەلورميتتال تەمىرتاۋ" شاحتەرلارى، مەتاللۋرگتار، جەزقازعانداعى "قازاقمىس" كەنشىلەرى، مىس بالقىتۋشىلار ەرەۋىلدەرىن باستادى. 4–5 قاڭتاردا وتاندىق ءوندىرىس وشاقتارى، ونەركاسىپتىك كاسىپورىندار، ءتۇستى، قارا مەتاللۋرگيا ءوندىرىسىنىڭ بەتكەۇستار وشاقتارىن نارازىلىق شارالارى جايلادى.

ناتيجەسىندە جاڭاوزەندە باستالعان نارازىلىقتان سوڭ، گاز باعاسى 50 تەڭگەگە ءتۇستى. بىرقاتار بيلىك وكىلدەرى قىزمەتىنەن بوساتىلىپ، كەيبىرىنىڭ ۇستىنەن وسى ۋاقىتقا دەيىن قىلمىستىق ءىس قوزعالىپ جاتىر. 

بۇرىنعى پرەزيدەنتتىڭ زاڭسىز بايىعان بىرقاتار تۋىسقاندارى، دوستارى قاماۋعا الىندى، الدى سوتتالدى. ال جاڭا پرەزيدەنتتىڭ جاقىن تۋىستارىنا جوعارى لاۋازىمداردى يەلەنۋگە تىيىم سالىندى. ونىڭ دا بيلىكتى جەكە-دارا يەلەنۋىنە توسقاۋىل قويىلدى. 

الايدا ورنى تولماس قازاعا الىپ كەلدى. 235-كە جۋىق ادام قازا تاۋىپ، 1 249 تۇلعا سوتتالدى. 2022 جىلى حالىقتى ەسەڭگىرەتىپ، بيلىكتى شوشىتقان 1 اپتاعا سوزىلعان وقيعا ەستەن كەتپەسى انىق. الدا وتكەننىڭ قاتەلىگىن قايتالاماۋ ءۇشىن قادامىمىزدى نىق باسۋىمىز كەرەك!

 

پىكىرلەر