Almaty kóshelerinde zıgzag tárizdi jańa jol belgisi paıda boldy. Bul týraly Almaty qalasy ákimdiginiń baspasóz qyzmeti málimdedi, dep habarlaıdy «Adyrna» ulttyq portaly.
Baspasóz málimetinshe, erekshe ırek syzyq Tilendıev kóshesinde paıda boldy.
Jaıaý júrginshiler jolaǵynyń aldyndaǵy ırek tańba shetelde bolǵan júrgizýshilerge tanys bolýy múmkin. Syrt pishini kózge úırenshikti bólý jolaqtarynan ózgeshe. Ol jolaqtyń tarylǵanyn kórsetip, jaıaý júrginshiler ótkeline jaqyndap qaldy degendi eskertedi.
Jol erejesinde bul týraly ne jazylǵan?
Sary zıgzag ázirge synaq rejıminde Tilendıev kóshesiniń Abaıdan Tóle bıge deıingi bóligine syzǵan. Sol sebepti Jol erejesinde bul belgi týraly málimet te, onyń sıpattamasy da joq. Ózge elde bul syzyqty da kesip ótýge tyıym salynǵan. Iaǵnı bul jerde ekinshi kólikti basyp ozýǵa nemese jaıaý júrginshini qaǵyp ketýdiń aldyn alý úshin ekinshi syzyqqa aýysýǵa bolmaıdy. Qazaqstanda resmı kúshine enbegendikten, bul tańbany basyp ótken júrgizýshiler aıyppul tólemeıdi.
Eger belgi kólik apatynyń azaıýyna áser etse, ony erejege engizip, qala jáne el aýmaǵynda qoldanady. Dese de synaqtan ótip jatqan aımaqta qansha jaıaý júrginshini kólik qaqqany týraly statıstıkalyq málimet joq.
Aıta keteıik, álemdegi kóp memlekette bul tańbany qoldaný onyń tıimdi ekenin kórsetti. Bular keı jerde jol belgisinen artyq. Biraq belgi men tańbadan bólek jaıaý júrginshiler qatysqan apatty azaıtý úshin táýlik boıy ótkel men ondaǵy adamdardyń kórinýin jaqsartý kerek. Joldaǵy tańba keı tusta belgiden de anyq kórinip turǵany abzal. Sonda júrgizýshi jyldamdyqty azaıtyp, kenet adam shyǵyp qalsa daıyn bolady.
«Adyrna» ulttyq portaly
