انادولى ەلىنىڭ استاناسى انكارا قالاسىندا تۇرىك رەسپۋبليكاسىنىڭ 100 جىلدىعى، تۇرىكسوي ۇيىمىنىڭ 30 جىلدىعىنا وراي دىنمۇحاممەد احمەتۇلى قوناەۆتىڭ 111 جىلدىعىنا ارنالعان «بابالار اماناتى» كىتابىنىڭ تۇساۋكەسەر شاراسى ءوتتى، دەپ حابارلايدى «ادىرنا» ۇلتتىق پورتالى.
اتالعان شارانى تۇركياداعى قازاق ەلشىسى ەركەبۇلان ساپيەۆ، تۇرىكسوي باسشىسى سۇلتان راەۆ ۇيىمداستىردى.
جيىندا تۇرىكسوي باس حاتشىسى سۇلتان راەۆ، قازاق ەلشىلىگىنىڭ كەڭەسشىسى مەرەي مۇقاجان، رەسپۋبليكانىڭ ۇزدىك ۇستازى قاناعات كودەكوۆ، د.قوناەۆ زامانىندا قازاق تەلەۆيزياسىنىڭ ءتىلشىسى بولعان، قازاقستاننىڭ ىستانبۇلداعى العاشقى باس كونسۋلى قىزمەتىن اتقارعان، قازاقستاننىڭ ەڭبەك سىڭىرگەن قايراتكەرى ەرجان ءۋايىس د.قوناەۆ تۋرالى ەستەلىكتەرمەن ءبولىستى.
جيىن بارىسىندا، شىعارماشىلىق، كوركەم ەڭبەكپەن اينالىساتىن مۇعالىمدەر جانە كاسىبي سۋرەتشىلەردىڭ تۋىندىلارى ەنگەن «بابالار اماناتى» كىتابىنىڭ تۇساۋى كەسىلدى. ەڭبەك قازاق، تۇرىك، ورىس، اعىلشىن تىلدەرىندە باسىلىپ شىققان.
سونداي-اق «ۇلى دالا» رقب توراعاسى عابيدەن ادىلبەكۇلى جاكەي قور اتىنان ءبىر توپ قاتىسۋشىلارعا د.قوناەۆ مەدالى ءتوس بەلگىسىن تاپسىرىپ، سۇلتان راەۆ ۇستاز قاناعات كودەكوۆتى ا.بايتۇرسىنوۆ مەدالىمەن ماراپاتتاعان. بۇدان بولەك حالىقارالىق د.قوناەۆ قورىنىڭ القا مۇشەسى، تۇركياداعى ۋاكىلى ەرجان ءۋايس قور پرەزيدەنتى ەلدار قوناەۆتىڭ اتىنان تۇرىكسوي باسشىسىنىڭ ورىنباسارى سايد يۋسۋپ مىرزاعا قازاق شاپانىن كيگىزدى. انكاراداعى «كوك تۋ» قازاق مادەني ورتالىعىنىڭ ءتورايىمى ءلاززات ميزالىموگۋلىنا «ۇلى دالا» رەسپۋبليكالىق قورىنىڭ ەستەلىك مەدالى تابىستالدى.
«ادىرنا» ۇلتتىق پورتالى
