Anadoly eliniń astanasy Ankara qalasynda Túrik Respýblıkasynyń 100 jyldyǵy, TúrikSOI uıymynyń 30 jyldyǵyna oraı Dinmuhammed Ahmetuly Qonaevtyń 111 jyldyǵyna arnalǵan «Babalar amanaty» kitabynyń tusaýkeser sharasy ótti, dep habarlaıdy «Adyrna» ulttyq portaly.
Atalǵan sharany Túrkııadaǵy Qazaq elshisi Erkebulan Sápıev, TúrikSOI basshysy Sultan Raev uıymdastyrdy.
Jıynda TúrikSOI Bas hatshysy Sultan Raev, Qazaq elshiliginiń keńesshisi Mereı Muqajan, respýblıkanyń úzdik ustazy Qanaǵat Kódekov, D.Qonaev zamanynda Qazaq televızııasynyń tilshisi bolǵan, Qazaqstannyń Ystanbuldaǵy alǵashqy Bas konsýly qyzmetin atqarǵan, Qazaqstannyń eńbek sińirgen qaıratkeri Erjan Ýáıis D.Qonaev týraly esteliktermen bólisti.
Jıyn barysynda, shyǵarmashylyq, kórkem eńbekpen aınalysatyn muǵalimder jáne kásibı sýretshilerdiń týyndylary engen «Babalar amanaty» kitabynyń tusaýy kesildi. Eńbek Qazaq, Túrik, Orys, Aǵylshyn tilderinde basylyp shyqqan.
Sondaı-aq «Uly dala» RQB tóraǵasy Ǵabıden Ádilbekuly Jákeı qor atynan bir top qatysýshylarǵa D.Qonaev medali tós belgisin tapsyryp, Sultan Raev ustaz Qanaǵat Kódekovty A.Baıtursynov medalimen marapattaǵan. Budan bólek Halyqaralyq D.Qonaev qorynyń alqa múshesi, Túrkııadaǵy ýákili Erjan Ýáıs qor prezıdenti Eldar Qonaevtyń atynan TúrikSOI basshysynyń orynbasary Saıd Iýsýp myrzaǵa Qazaq shapanyn kıgizdi. Ankaradaǵy «Kók Tý» Qazaq mádenı ortalyǵynyń tóraıymy Lázzát Mızalimogýlyna «Uly Dala» respýblıkalyq qorynyń estelik medali tabystaldy.
«Adyrna» ulttyq portaly
