تۇركياداعى اتىس كەزىندە قازاقستاندىق ازامات جارالانعان. سىرتقى ىستەر مينيسترلىگىنىڭ مالىمەتىنشە، قازىر ول ىستامبۇلداعى اۋرۋحانالاردىڭ بىرىندە جاتىر. بۇل تۋرالى كتك ارناسى جاريالادى، دەپ حابارلايدى “ادىرنا” ۇلتتىق پورتالى.
تەلەارنانىڭ حابارلاۋىنشا، وقيعا كەشە، 19 ءساۋىر چەكمەكيوي پروۆينتسياسىندا بولعان. كوپقاباتتى ۇيلەردىڭ ءبىرىنىڭ جانىندا بەلگىسىز ەكى ادام وق جاۋدىرعان.
سىرتقى ىستەر مينيسترلىگىنىڭ مالىمەتىنشە، 31 جاستاعى قازاقستاندىق ازامات وقىس وقيعا كەزىندە سول جەردە كەزدەيسوق بولىپ، وقتىڭ ءبىرى وعان تيگەن.
ۆەدومستۆو ەر ادامنىڭ كونسۋلدىققا حابارلاسىپ، جاراقاتى تۋرالى ايتقانىن مالىمدەدى.
قازاقستاندىق ديپلوماتتار ونى ىستامبۇلداعى اۋرۋحانالاردىڭ بىرىنە جەتكىزدى. سونىمەن قاتار قازاقستاندىقتىڭ تۇركيادا وتباسىمەن بىرگە بولعانى بەلگىلى بولدى. ول ەكى جاسار قىزىن ەمدەتۋگە اكەلگەن.
