تۇركيا اقش ەلشىلىگىنىڭ كوڭىل ايتۋىن قابىلدامادى. بۇل تۋرالى تۇركيا ىشكى ىستەر ءمينيسترى سۇلەيمان سويلۋ تەرگەۋگە ىستامبۇلداعى لاڭكەستىك ارەكەتتىڭ قاي جەردەن ۇيلەستىرىلگەنى ءمالىم ەكەنىن، سوندىقتان ەلدەگى اقش ەلشىلىگىنىڭ كوڭىل ايتۋى قابىلدانباعانىن مالىمدەدى، دەپ حابارلايدى “ادىرنا” ۇلتتىق پورتالى ريا نوۆوستيگە سىلتەمە جاساپ.
«ءبىز شابۋىلدىڭ قاي جەردە ۇيلەستىرىلگەنىن بىلەمىز. بىزگە جىبەرىلگەن حابارلامانى الدىق جانە ونىڭ قانداي حابار ەكەنىن بىلەمىز. ءبىز امەريكا ەلشىلىگىنىڭ كوڭىل ايتۋىن قابىلدامايمىز. ءبىز ەشكىمگە وپاسىزدىق جاساعان ەمەسپىز، سوندىقتان مۇنداي ارامزالىققا بۇدان بىلاي توزىمدىلىك تانىتپايمىز. يستيكلال كوشەسى – ءبىزدىڭ اياۋلى ورتامىز. ەگەر شابۋىلداۋشىنى ۇستاماعانىمىزدا، ول بۇگىن گرەكياعا قاشىپ كەتەر ەدى»، - دەدى مينيستر CNN Türk ارناسىنا بەرگەن سۇحباتىندا.
اق ءۇيدىڭ ءباسپاسوز حاتشىسى كارين جان-پەر اقش-تىڭ ىستامبۇلدا بولعان زورلىق-زومبىلىق ارەكەتىن ايىپتايتىنىن، سونداي-اق قۇربان بولعانداردىڭ تۋىستارىنا كوڭىل ايتاتىنىن مالىمدەدى.
ايتا كەتەيىك، ءبىر كۇن بۇرىن ىستامبۇل ورتالىعىنداعى جاياۋ تۋريستەرگە ارنالعان يستيكلال كوشەسىندە جارىلىس بولىپ، 6 ادام قازا تاپقان بولاتىن. كەيىن تۇركيا ۆيتسە-پرەزيدەنتى فۋات وكتاي 81 ادام جارالانعانىن حابارلادى.
سونىمەن قاتار، ىستامبۇلدا لاڭكەستىك جاسادى دەگەن كۇدىكپەن ۇستالعان ايەلدىڭ سۋرەتى جاريالاندى.
تۇركيا باق-تارىنىڭ حابارلاۋىنشا، ۇستالعان ادام سيريا ازاماتى - الام ءال باشير. ول ەلدە تەرروريستىك دەپ تانىلعان كۇردىستاننىڭ جۇمىسشى پارتياسىمەن بايلانىسى بار ەكەنىن مويىنداعان.
