الماتى قالاسىندا تۇركى اكادەمياسى مەن م.و. اۋەزوۆ اتىنداعى ادەبيەت جانە ونەر ينستيتۋتىنىڭ بىرلەسىپ ۇيىمداستىرۋىمەن كورنەكتى اقىن، پەداگوگ، الاش قوزعالىسىنىڭ قايراتكەرى ماعجان جۇماباەۆتىڭ 130 جىلدىق مەرەيتويىنا وراي «ماعجان جۇماباەۆ مۇراسى: تۇركى دۇنيەسىنىڭ رۋحاني تۇتاستىعى مەن تاريحي ساباقتاستىعى» اتتى حالىقارالىق عىلىمي-تاجىريبەلىك كونفەرەنتسيا ءوتتى، دەپ حابارلايدى «ادىرنا» ۇلتتىق پورتالى Egemen.kz-كە سىلتەمە جاساپ.
ءىس-شاراعا ادەبيەتتانۋ، ءتىلتانۋ، ونەرتانۋ، پەداگوگيكا سالاسى بويىنشا قازاقستاننىڭ جانە شەتەلدىڭ عالىمدارى، حالىقارالىق ۇيىم وكىلدەرى، قوعام قايراتكەرلەرى جانە ينستيتۋتتىڭ عىلىمي قىزمەتكەرلەرى قاتىستى. جيىندى م.و. اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى، قر ۇعا كوررەسپوندەنت مۇشەسى، فيلولوگيا عىلىمدارىنىڭ دوكتورى كەنجەحان ماتىجانوۆ جۇرگىزدى.
كونفەرەنتسيادا تۇركى اكادەمياسىنىڭ ۆيتسە-پرەزيدەنتى اسحات كەسىكباەۆ ءسوز سويلەپ، اكادەميا باسشىسى شاھين مۇستافاەۆتىڭ قۇتتىقتاۋىن جەتكىزدى.
سونىمەن قاتار جيىندا قازاقستان عىلىم جانە جوعارى ءبىلىم ءمينيسترى ساياسات نۇربەكتىڭ، الماتى قالاسى اكىمى ەربولات دوساەۆتىڭ جانە قازاقستان جازۋشىلار وداعىنىڭ توراعاسى مەرەكە قۇلكەنوۆتىڭ قۇتتىقتاۋ حاتتارى وقىلدى.
كونفەرەنتسيا بارىسىندا، ماعجاننىڭ اقىندىق الەمى، ماعجان جۇماباەۆ جانە حح-ءححى عاسىرداعى ادەبي-مادەني بايلانىستار، ماعجانتانۋ جانە تۇركولوگيا سالاسى، كوركەم ادەبيەتتەگى ماعجاننىڭ اقىندىق ءداستۇرى، ماعجان جۇماباەۆتىڭ اعارتۋشىلىق قىزمەتى، ماعجان جۇماباەۆتىڭ قايراتكەرلىك تۇلعاسى جانە الاش قوزعالىسى، ماعجانتانۋدىڭ قازىرگى زامانعى وزەكتى ماسەلەلەرى جانە ارحيۆ، مۋزەي جانە سيرەك قولجازبا دەرەكتەرىندەگى ماعجان مۇراسى سىندى زەرتتەۋ باعىتتارى بويىنشا ءوربىدى.
باسقوسۋدا مىرزا ۇلىقبەك اتىنداعى وزبەكستان ۇلتتىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى ناسيمحون راحمانوۆ، قر ۇعا اكادەميگى، تاريح عىلىمدارىنىڭ دوكتورى مامبەت قويگەلدى، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى دانداي ىسقاقۇلى، ەۋرازيا عىلىمي-زەرتتەۋ ينستيتۋتىنىڭ ديرەكتورى سۋات بەيلۋر، تۇركى اكادەمياسىنىڭ عىلىمي قىزمەتكەرى، فولكلورتانۋشى اقەدىل تويشانۇلى، قازاقستان جازۋشىلار وداعى توراعاسىنىڭ ورىنباسارى باۋىرجان جاقىپ، قىرعىز رەسپۋبليكاسىنىڭ ۇلتتىق عىلىم اكادەمياسى چ.ايتماتوۆ اتىنداعى ءتىل جانە ادەبيەت ينستيتۋتىنىڭ قىرعىز ادەبيەتى ءبولىمىنىڭ جەتەكشىسى، فيلولوگيا عىلىمدارىنىڭ دوكتورى كەلدىبەك قويلۋباەۆ، م. اۋەزوۆ اتىنداعى ادەبيەت جانە ونەر ينستيتۋتى «قولجازبا جانە تەكستولوگيا» عىلىمي-يننوۆاتسيالىق ورتالىعىنىڭ ديرەكتورى جۇماشاي راقىش زەرتتەۋ تاقىرىپتارى بويىنشا بايانداما جاسادى.
سونىمەن قاتار جيىندا م. جۇمابەۆتىڭ شىعارمالارىنىڭ ءۇش تومدىق اكادەميالىق تولىق جيناعىنىڭ تۇساۋكەسەرى ءوتتى. تۇركى اكادەمياسىنىڭ قولداۋىمەن باسپاعا ازىرلەنگەن جيناقتىڭ ءبىرىنشى تومىنا اقىننىڭ ولەڭدەرى توپتاستىرىلسا، ەكىنشى تومعا پوەمالارى مەن اڭگىمەسى، اۋدارمالارى ەنگىزىلگەن. م.جۇماباەۆ ازىرلەگەن وقۋ قۇرالدارى مەن ماقالالارى ءۇشىنشى تومعا توپتاستىرىلعان. بارلىق شىعارمالارىنا عىلىمي تۇسىنىكتەمەلەر بەرىلگەن.
كونفەرەنتسيا اياسىندا عىلىم ورداسى رمك ورتالىق عىلىمي كىتاپحاناسى ماعجان جۇماباەۆتىڭ شىعارماشىلىعىنا ارنالعان كىتاپ كورمەسىن ۇيىمداستىردى.
عىلىمي وتىرىستان كەيىن قوناقتار م. اۋەزوۆ مۇراجاي-ۇيىندە كينورەجيسسەر، دوكۋمەنتاليست حاليل وماروۆ تۇسىرگەن «ماعجان جۇماباەۆ» دەرەكتى ءفيلمىن تاماشالادى.
«ادىرنا» ۇلتتىق پورتالى
