مەملەكەت باسشىسى ازيا ويىندارىنىڭ جەڭىمپازدارىن قابىلدادى، - دەپ حابارلايدى "ادىرنا" ءتىلشىسى اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت قاسىم-جومارت سپورتشىلاردى مەدالدارىمەن قۇتتىقتادى. ول ريزابەك ايتمۇحاننىڭ ەركىن كۇرەستەن قازاقستاننان شىققان تۇڭعىش قازاق الەم چەمپيونى بولعانىن ەسكە سالدى.
«باسەكە وتە جوعارى بولعان ازيادا ويىندارىندا ەل قۇراماسى 10 التىن، 22 كۇمىس، 48 قولا مەدال يەلەندى. اتلەتتەرىمىز نىسانا كوزدەۋ، ەسكەك ەسۋ، ۆەلوجارىس، دجيۋ-دجيتسۋ سپورتىنان ۇزدىك شىقتى. مەملەكەت باسشىسى كاراتەدەن جالپى كوماندالىق ەسەپتە ءبىرىنشى ورىن العان قازاقستان قۇراماسىن ەرەكشە اتاپ ءوتىپ، وسى سپورت تۇرىنەن ازياداعا قاتىسقان 8 سپورتشىنىڭ ءبارى جەڭىس تۇعىرىنا كوتەرىلگەنىنە نازار اۋداردى»، - دەپ حابارلايدى اقوردانىڭ ءباسپاسوز قىزمەتى.
قاسىم-جومارت توقاەۆتىڭ ايتۋىنشا، جەرلەستەرىمىزدىڭ جەتىستىگىنە جاتتىقتىرۋشىلار مەن باسقا دا مامانداردىڭ قوسقان ۇلەسى زور. بۇل رەتتە پرەزيدەنت سپورتتا جەڭىس پەن جەڭىلىس قاتار جۇرەتىنىن اتاپ ءوتتى.
«قاجىرلى ەڭبەك پەن جەڭىسكە دەگەن مۇقالماس ەرىك-جىگەردىڭ ارقاسىندا ارقايسىڭىز جوعارى ناتيجەگە قول جەتكىزدىڭىزدەر. الايدا ەلىمىزدىڭ جالپى كورسەتكىشى وتكەن وليمپيادا مەن ازيادا ويىندارىنان دا وتە جاقسى بولۋى مۇمكىن ەدى. مۇنى اشىق ايتۋىمىز كەرەك. بوكس، اۋىر اتلەتيكا، ەركىن جانە گرەك-ريم كۇرەسى ءداستۇرلى تۇردە ەل قۇراماسىنىڭ قورجىنىنا جۇلدە سالىپ، ايتارلىقتاي ۇلەس قوساتىن. جەڭىل اتلەتيكا، سپورتتىڭ كوماندالىق تۇرلەرى جانكۇيەرلەرىمىزدى كوبىرەك قۋانىشقا بولەيتىن. بارلىق سپورت ءتۇرى بويىنشا كەتكەن قاتەلىكتەردى تۇزەتۋ ءۇشىن اۋقىمدى جۇمىس اتقارۋ قاجەت»، - دەدى مەملەكەت باسشىسى.
مەملەكەت باسشىسى سپورت سالاسى ءاردايىم مەملەكەتتىڭ نازارىندا ەكەنىن اتاپ ءوتتى. جىل سايىن سپورتتى دامىتۋعا قوماقتى قارجى بولىنۋدە. دەگەنمەن، قاسىم-جومارت توقاەۆتىڭ ايتۋىنشا، ەلىمىزدىڭ سپورتتاعى كورسەتكىشى جوعارى دەڭگەيدە ەمەس.
"اشىعىن ايتۋىمىز كەرەك، ناتيجەمىز مەملەكەتتەن ءبولىنىپ جاتقان قاراجاتتىڭ بارىنشا ءتيىمدى جۇمسالمايتىنىن كورسەتەدى. مۇنداي جاعدايعا جول بەرۋگە بولمايدى. سپورت سالاسىنا تۇبەگەيلى وزگەرىستەر، ياعني رەفورما قاجەت. ءتيىستى مينيسترلىك وسى ماسەلەنى جان-جاقتى قاراپ، سپورتتى دامىتۋدىڭ مۇلدە جاڭا جولدارىن ۇسىنۋى كەرەك»، - دەدى پرەزيدەنت.
ايتا كەتەيىك، قازاقستاننىڭ سپورت دەلەگاتسياسى ازيا ويىندارىن 10 التىنمەن اياقتادى. بۇل ناتيجە قازاقستاندىقتارعا مەدالدىق ەسەپتە سوڭعى نۇسقادا 11-ورىنعا شىعۋعا مۇمكىندىك بەردى.
ءبىرىنشى ورىندى قىتاي، ەكىنشى ورىندى جاپونيا مەن وڭتۇستىك كورەيا يەلەندى. قازاقستان ءۇشىن حانچجوۋداعى كورسەتكىش جازعى ازيا ويىندارىنا قاتىسۋ تاريحىنداعى ەڭ ناشار كورسەتكىش بولدى. 2018 جىلى ينچحوندا قازاقستاندىقتار 9-ورىنعا تابان تىرەدى، ال العاشقى التى قۇرلىقتىق تۋرنيردە مەدالدىق ەسەپتە 5-ءشى ورىننان تومەن ەمەس ورىنداردى يەلەندى.
