تالدىقورعان قالاسىنداعى نازارباەۆ زياتكەرلىك مەكتەبىندە حالىقارالىق «ۇستازدار كۇنى» مەرەكەسى اتالىپ ءوتتى. مەرەكە اياسىندا «ۇستازىم، سىزگە مىڭ العىس!» اكتسياسى باستاۋ الدى. مەكتەپتىڭ بۇكىل پەداگوگيكالىق ۇجىمى مەن وقۋشىلارى ۇستازدارىنا قۇرمەت كورسەتىپ، العىس سوزدەرىن ايتۋعا اسىقتى.
ممەكتەپ ديرەكتورى ۆيكتور سوسين ءوزىنىڭ بيولوگيا ءپانىنىڭ مۇعالىمى كان سۆەتلانا الەكساندروۆنانى قۇتتىقتادى.
№20 دارىندى بالالارعا ارنالعان ليتسەيدە سۆەتلانا الەكساندروۆنا وقۋشى ۆيكتورگە ساباق بەرگەن بولاتىن. سۆەتلانا الەكساندروۆنا 40 جىلدان استام ءومىرىن ءبىلىم سالاسىنا ارنادى، رەسپۋبليكالىق جانە حالىقارالىق وليمپيادالار مەن عىلىمي جوبالاردىڭ جەڭىمپازدارىن دايىندادى.
بۇگىنگى تۇلەكتەرى – ەلگە عانا ەمەس، شەت ەلدەرگە دە تانىمال دارىگەرلەر، بيولوگتار، عالىمدار.
تالدىقورعانداعى NIS دەنە شىنىقتىرۋ ءپانىنىڭ مۇعالىمى بولات يسابەكوۆ العاشقى ۇستازىنا كۇتپەگەن توسىن سىي جاسادى. «جاننا قاجىمۇراتقىزى، كىرسەم بولا ما؟» دەپ سىنىبىنىڭ ەسىگىن قاققاندا، ءوزىن تاعى دا وقۋشىداي سەزىندى. ويتكەنى، سول كەزدەن بەرى 30 جىل ءوتتى.
اربىر ادامنىڭ ومىرىندە ءبىرىنشى ۇستازدىڭ الاتىن ورنى ەرەكشە. ونىڭ ومىرلىك نۇسقاۋلارى مەن جىلى كۇلكىسى ءالى ەسىمدە. كىشى سىنىپتاردا وقىپ جۇرگەندە مەكتەپ وقۋشىلارىنىڭ بارلىعى ناسيحا ۋاليقىزىنىڭ قامقورلىعى مەن ماحابباتىن سەزىنەتىن»، — نازيرا سۇلتانوۆا تالدىقورعانداعى NIS تاريح ءپانىنىڭ مۇعالىمى ءوزىنىڭ العاشقى ۇستازى تۋرالى ەستەلىكتەرىمەن ءبولىستى.
بۇل كۇنى تۇڭعىش ۇستازى ناسيحا ۋاليەۆا شاكىرتىن ءۇيىنىڭ بوساعاسىنىن الدىنان قارسى الدى. قۇشاقتاسىپ، اق تىلەكتەر ايتىلىپ، جىلى ەستەلىكتەر مەن اڭگىمە - دۇكەن داستارحان ۇستىندە جالعاستى. ارادا ونداعان جىلدار وتسە دە، مەكتەپ جىلدارى مەن العاشقى ۇستاز جۇرەكتە ماڭگى ساقتالادى.
ءتارتىپ - ادام بويىنداعى تۋما قاسيەت دەپ ەسەپتەلەدى. بىراق تالدىقورعانداعى NIS اسكەري دايىندىق ءپانىنىڭ مۇعالىمى ايبات قۋانىشباەۆ بۇل پىكىرمەن مۇلدەم كەلىسپەيدى.
ماسەلەن، ەشبىر بالا تۋىسىمەن ءتارتىپتى، ەڭبەكسۇيگىش، نە جالقاۋ، نە ۇستامدى بولىپ تۋمايدى. ونىڭ مىنەزى ۇزاق جىلعى ءومىر ءسۇرۋ بارىسىندا قالىپتاسىپ وتىرادى. قالىپتاستىرۋشىنىڭ ءبىرى – ۇستاز بولىپ كەلەدى.
ەڭ باستى داعدىنى ايبات قۋانىشباەۆ دەنە شىنىقتىرۋ ءپانىنىڭ مۇعالىمى ناتاليا بايسەرىكوۆادان العانىن ايتتى.
بۇل كۇنى 7-سىنىپ وقۋشىسى كوركەم ايتمولدا سىنىپ جەتەكشىسىنە العىسىن ءبىلدىردى. ۇستازىنىڭ قولداۋى ارقاسىندا ول بيىلعى جىلى كونكۋرستىق ىرىكتەۋدەن ءساتتى ءوتىپ، تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىسى اتاندى.
