بۇگىن — ۇستازدار كۇنى. بۇل مەرەكە بيىلدان باستاپ 5 قازان كۇنى اتاپ وتىلەدى. وقۋ-اعارتۋ مينيسترلىگىنىڭ ايتۋىنشا، اتالعان داتانى تويلاۋ دۇنيەجۇزىلىك مۇعالىمدەر كۇنىمەن سايكەستەندىرىلگەن، دەپ حابارلايدى «ادىرنا» ءتىلشىسى.
وقۋ-اعارتۋ ءمينيسترى عاني بەيسەمباەۆ مەرەكەنىڭ ەڭ اسىل، جاۋاپتى ءارى ماڭىزدى ماماندىق يەلەرىن بىرىكتىرە تۇسەرىن اتاپ ءوتتى.
«قۇرمەتتى ارىپتەستەر! قادىرلى ۇستازدار! سىزدەردى ءتول مەرەكەمىز – مۇعالىمدەر كۇنىمەن شىن جۇرەكتەن قۇتتىقتايمىن! ەلىمىزدەگى ميلليونداعان جاس ورەن وزدەرىڭىزدەن تاعىلىمدى تاربيە، ونەگەلى ءبىلىم الىپ، ۇلكەن ءومىر جولىنا قادام باسادى. سىزدەردىڭ قاجىرلى ەڭبەكتەرىڭىزدىڭ، شىدامدىلىقتارىڭىز بەن ادالدىقتارىڭىزدىڭ ارقاسىندا كەلەشەك ۇرپاقتىڭ نەگىزى قالىپتاسادى. سىزدەرگە زور قۇرمەتپەن شىنايى العىسىمدى بىلدىرەمىن. تۇلعا دامۋىنىڭ باستاۋىندا تۇرعان، بويىنداعى ءبىلىمىن بالالارعا بەرىپ، ولاردى ەڭبەكسۇيگىشتىككە، ادامگەرشىلىككە، ەلجاندىلىققا، ءوز وتانىنا دەگەن سۇيىسپەنشىلىككە باۋليتىن – سىزدەرسىزدەر. قۇرمەتتى ارىپتەستەر، بۇل ماڭىزدى دا كۇرمەۋى قيىن جولداعى شەشۋشى ءرول سىزدەرگە عانا تيەسىلى! بيىل العاش رەت پەداگوگتەردىڭ كاسىبي مەرەكەسى – مۇعالىمدەر كۇنى 5 قازانعا بەكىتىلدى. بۇل مەرەكە ەڭ اسىل، جاۋاپتى ءارى ماڭىزدى ماماندىق يەلەرىن بىرىكتىرە تۇسەرى ءسوزسىز»،—دەدى ول.ايتۋىنشا، بۇگىنگى تاڭدا ەلىمىزدەگى مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ سالاسىندا 500 مىڭعا جۋىق پەداگوگ جۇمىس ىستەيدى. ولارعا جاقسى جاعداي جاسالانىپ وتىر.
«مەملەكەت باسشىسىنىڭ قولداۋىمەن 2019 جىلى ماڭىزدى ماسەلەلەردىڭ ءبىرى – پەداگوگ ماماندىعىنا ەرەكشە مارتەبە بەرۋ تۋرالى شەشىم قابىلداندى. ءتورت جىل ىشىندە پەداگوگتەردىڭ ەڭبەكاقىسى ەكى ەسە ءوستى. 2023 جىلدىڭ 1 قاڭتارىنان باستاپ مۇعالىمدەردىڭ جالاقىسى تاعى 25 پايىزعا كوتەرىلدى. بۇگىندە 220 مىڭداي مۇعالىمگە تاعايىندالعان ساناتتارىنا قاراي 50 پايىزعا دەيىن ۇستەماقى تولەنىپ وتىر. وسى جىلدىڭ قىركۇيەك ايىنان باستاپ مەكتەپكە دەيىنگى ۇيىمداردا ەڭبەك ەتەتىن 97 مىڭ پەداگوگتىڭ جالاقىسى تاعى 30 پايىزعا ءوستى. سونىمەن قاتار، بيىل العاش رەت 90 مىڭنان استام پەداگوگ بىلىكتىلىكتى ارتتىرۋ كۋرستارىنان ءوتتى»،—دەدى عاني بەيسەمباەۆ.مينيستر مۇعالىمدەردى اتتەستاتتاۋ پروتسەسىنىڭ جەتىلدىرىلىپ جاتقانىن اتاپ ءوتتى.
«ءبىز ءبىلىم بەرۋ جۇيەسىنىڭ ۇزدىكسىز دامۋى ءۇشىن بارىنشا جاعداي جاساۋىمىز كەرەك. ءاربىر ۇستازدىڭ ەڭبەگى شاكىرتتەرىنىڭ جەتىستىگىمەن باعالانۋى كەرەك دەپ ەسەپتەيمىز. بۇل ءۇشىن مۇعالىمدەردى ۇلتتىق پلاتفورما نەگىزىندە اتتەستاتتاۋدى اۆتوماتتاندىرۋ جۇمىستارى جۇرگىزىلۋدە. ول - وبەكتيۆتى جانە اشىق بولۋى ءتيىس. پەداگوگيكا جانە وقىتۋ ادىستەمەسى بويىنشا تەستىلەۋ الىنىپ تاستالدى. مۇعالىمنىڭ كاسىبي قۇزىرەتتىلىگى تەك مودەراتور مەن ساراپشىعا اۋىسقاندا كەزدە عانا ءوز ءپانى بويىنشا باعالاناتىن بولادى. ەلىمىزدىڭ ۇزدىك مۇعالىمدەرى «ءبىلىم بەرۋدەگى وزگەرىستىڭ 1000 كوشباسشىسى» رەسپۋبليكالىق كادر رەزەرۆىنە قابىلدانا الادى. ال ەڭ مىقتىلارى «بولاشاق» باعدارلاماسى بويىنشا شەتەلدىك تاعىلىمدامادان وتۋگە جىبەرىلەدى. ءبىز قازىرگى مۇعالىم ءيميدجىن، حالىق دارىپتەيتىن «ۇستازدىڭ ورنى – ءتور» بەينەسىنە دەيىن قايتا كوتەرىپ، جاڭعىرتۋعا مىندەتتىمىز. وسى ماقساتتا مينيسترلىك ءبىلىم سالاسىندا 30 جانە ودان دا كوپ جىل ەڭبەك ەتكەن مۇعالىمدەردى «ەڭبەك ارداگەرى» مەدالىمەن ماراپاتتاۋ تۋرالى شەشىم قابىلدادى. العاش رەت رەسپۋبليكالىق پەداگوگيكا قىزمەتكەرلەردىڭ ارداگەرلەر كەڭەسى قۇرىلدى. بۇنداي كەڭەستەر ەلىمىزدىڭ ءار ايماعىندا قۇرىلادى. وسى جاسالعان شارالار سىزدەردىڭ ەڭبەكتەرىڭىزگە، كاسىبي شىڭدالۋلارىڭىزعا قولايلى جاعداي تۋعىزىپ، بالالارىمىزدىڭ ءبىلىم ساپاسىن ارتتىرۋىنا سەبەپ بولاتىنا بەك سەنىمدىمىن»،—دەپ تۇيىندەدى ول.
