بۇگىن قازاق ۇلتتىق قىزدار پەداگوگيكالىق ۋنيۆەرسيتەتتىڭ رەكتورى گۇلميرا قاناي ارداگەر ۇستازدارمەن كەزدەستى.
الماتىدا ۋنيۆەرسيتەتتىڭ 80 جىلدىق مەرەيتويىنا وراي جوعارى وقۋ ورىنىنىڭ زيالى تۇلەكتەرى – ۇستازدارمەن كەزدەسۋ ءوتتى. شارا قازاق ۇلتتىق قىزدار پەداگوگيكالىق ۋنيۆەرسيتەتىنىڭ دامۋىنا زور ۇلەس قوسقان ۇستازدار مەن عالىمداردىڭ ءومىر جولى مەن عىلىمي-پەداگوگيكالىق قىزمەتتەرىن ناسيحاتتاۋ ماقساتىندا ۇيىمداستىرىلدى. سونىمەن قاتار ۇلتتىق عىلىم مەن ءبىلىمنىڭ وتكەنى مەن بۇگىنىن، بولاشاعىن تالقىلاۋ، جاس عالىمدار مەن زەرتتەۋشىلەردىڭ عىلىمي الەۋەتىن دامىتۋ ماسەلەلەرى كەزدەسۋگە ارقاۋ بولدى.
«ەل بولاشاعى – ۇستازداردىڭ قولىندا. ۇلاعاتتى ۇستازداردىڭ ارقاسىندا ەلىمىزدىڭ پەداگوگيكالىق جانە وزگە دە سالالارى جوعارى بىلىكتى ماماندارمەن تولىقتىرىلىپ جاتىر. تاربيەلى جاستارىمىز ادال قىزمەت ەتىپ، كاسىبي بىلىكتىلىكتەرىن ارتتىرۋدا. بۇل ەڭ الدىمەن، ءسىز مەن ءبىزدىڭ توقتاۋسىز ىزدەنىسىمىزدىڭ، كاسىبىمىزگە دەگەن ماحابباتىمىز بەن ادال قىزمەتىمىزدىڭ، ەلىمىزگە، جاس ۇرپاققا دەگەن سۇيىسپەنشىلىگىمىزدىڭ بەلگىسى دەپ بىلەمىن»، – دەدى ۋنيۆەرسيتەت رەكتورى گۇلميرا قاناي.
جيىندا مەملەكەت باسشىسى قاسىم-جومارت كەمەلۇلى توقاەۆتىڭ قازاقستان حالقىنا جولداۋىندا ايتىلعان ۇستازداردىڭ بىلىكتىلىگىن ارتتىرۋ ماسەلەسى تالقىلاندى. ۋنيۆەرسيتەتتىڭ جەتكەن جەتىستىكتەرى مەن العا قويعان جوسپارلارى دا ايتىلدى. سونىمەن قاتار ءبىلىم وردامىزدىڭ اعا وقىتۋشىلارى مەن ءبىلىم جانە عىلىم سالاسىندا قىزمەت ەتىپ جۇرگەن ۋنيۆەرسيتەت تۇلەكتەرى ءوز باياندامالارىن ۇسىندى.
فيزيكا-ماتەماتيكا عىلىمدارىنىڭ دوكتورى، پروفەسسور ەرشينا ايناگۇل قاپاسوۆنا ۋنيۆەرسيتەت باسشىلىعىنا العىسىن ايتتى.
«مەن وسى ۋنيۆەرسيتەتتىڭ 1971 جىلعى تۇلەگىمىن. بۇگىندە فيزيكا-ماتەماتيكا عىلىمدارىنىڭ دوكتورى، پروفەسسورمىن. ءبىلىم سالاسىندا قىزمەت ەتكەنىمە 37 جىل بولدى. ءار جەتكەن جەتىستىگىم قادىرلى ۇستازدارىمنىڭ قاجىرلى ەڭبەگى دەپ بىلەمىن. سول كىسىلەردىڭ جولىمەن ءبىز دە شاكىرت تاربيەلەپ كەلەمىز. ءبىزدىڭ باستى ماقساتىمىز – شاكىرتتەرگە ساپالى ءبىلىم بەرۋ. ەڭبەگىمىزدى ەسكەرىپ، ەلەپ جاتقان ۋنيۆەرسيتەت باسشىلىعىنا ايتار العىسىم شەكسىز»، – دەدى ۇستاز.
كەزدەسۋ سوڭىندا زيالى ۇستازداردى ماراپاتتاۋ ءراسىمى ءوتتى.
