5 قازان - ۇستازدار كۇنى، دەپ حابارلايدى “ادىرنا” ۇلتتىق پورتالى.
ءار جىل سايىن ەلىمىزدە ۇستازدار كۇنى قازان ايىنىڭ ءبىرىنشى جەكسەنبىسىندە اتالىپ وتىلەتىن.
وتكەن جىلدان باستاپ اتاۋلى داتانى تويلاۋ الەمنىڭ 100-دەن استام ەلىندە اتاپ وتىلەتىن دۇنيەجۇزىلىك مۇعالىمدەر كۇنىمەن ءبىر كۇندە تويلانادى دەپ بەكىتىلدى. الەمدە مۇعالىمدەر كۇنى العاش رەت 1994 جىلى 5 قازاندا اتاپ ءوتىلدى.
قر وقۋ-اعارتۋ ءمينيسترى عاني بەيسەمباەۆ قازاقستاندىق ۇستازداردى كاسىبي مەرەكەسىمەن قۇتتىقتادى.
“قۇرمەتتى ۇستازدار! قادىرلى ارىپتەستەر!
سىزدەردى كاسىبي مەرەكەمىز - ۇستازدار كۇنىمەن شىن جۇرەكتەن قۇتتىقتايمىن!
ۇستاز - ماماندىق يەسى عانا ەمەس، ول وسكەلەڭ ۇرپاقتىڭ رۋحاني باعبانى، بولاشاقتىڭ نەگىزىن قالاۋشى ۇلت كەلبەتى. قازاق حالقى قاي ۋاقىتتا بولماسىن، ۇستازدى قۇرمەتپەن تورگە وزدىرعان.
«ۇستاز – ۇلىق ەمەس، ۇلى قىزمەت» دەپ باتىر باۋىرجان مومىشۇلى باعالاعانداي، مەملەكەتتىڭ ەرتەڭگى تاعدىرىنا جاۋاپتى ۇرپاقتى تاربيەلەۋدە ۇستازدارعا ارتىلعان اماناتتىڭ جۇگى سالماقتى. سەبەبى، ءاربىر شاكىرتتىڭ جۇرەگىنە ءبىلىمنىڭ شامشىراعىن جاعاتىن – ۇستاز.
بۇگىندە وقۋ-اعارتۋ جۇيەسىندە 600 مىڭعا جۋىق پەداگوگ ەڭبەك ەتۋدە. مەملەكەت باسشىسىنىڭ قولداۋىنىڭ ارقاسىندا پەداگوگ ماماندىعىنىڭ بەدەلىن ارتتىرۋ بويىنشا وراسان زور شارالار جۇزەگە اسىرىلدى. ونىڭ العاشقىسى دا، ماڭىزدىسى - مۇعالىم قاۋىمى كوپتەن كۇتكەن «پەداگوگ مارتەبەسى» تۋرالى زاڭنىڭ قابىلدانعانىنا دا بيىل 5 جىل. وسى ۋاقىت ارالىعىندا مۇعالىمدەردىڭ ايلىعى ەكى ەسەگە كوتەرىلدى، ولار قاعازباستىلىقتان، ارتىق جۇكتەمەدەن، ءوز مىندەتىنە جاتپايتىن جۇمىستان بوساتىلدى، جاڭا ىنتالاندىرۋلار بەلگىلەنىپ، مۇمكىندىكتەرگە جول اشىلدى. بالاباقشا تاربيەشىلەرى مەن كوللەدجدەرگە وندىرىستەن تارتىلعان وقىتۋشىلاردىڭ جالاقىسى ارتۋدا. ءبىلىم بەرۋ ۇيىمدارىنىڭ ينفراقۇرىلىمىنىڭ، ماتەريالدىق-تەحنيكالىق بازاسىنىڭ جوعارعى تالاپتارعا سايكەس جاقسارۋى مەن جابدىقتالۋىنا باعىتتالعان «جايلى مەكتەپ» ۇلتتىق جوباسى مەملەكەت تاراپىنان ءبىلىم سالاسىنا سوڭعى جىلداردا كورسەتىلگەن قامقورلىقتىڭ ايقىن مىسالى بولا الادى. بۇل باعىتتاعى جۇمىس ءالى دە كۇشەيتىلىپ، جالعاسۋدا.
ۇلى اعارتۋشى ىبىراي التىنسارين «مۇعالىم – مەكتەپتىڭ جۇرەگى» دەپ بەكەر ايتپاعان. مەكتەپتىڭ، بالانىڭ بولاشاعى سىزدەردىڭ قولدارىڭىزدا، قۇرمەتتى ۇستازدار!
سىزدەردىڭ ەڭبەكتەرىڭىز – ەلىمىزدىڭ جارقىن ءارى باقىتتى بولاشاعىنىڭ نەگىزى. ءبىز حالقىمىزدىڭ داستۇرلەرى مەن قۇندىلىقتارىنا قۇرمەتپەن قاراپ، قادىرلەيتىن سانالى ۇرپاق قالىپتاستىرۋعا بار جان-ءتانىمىزدى سالامىز. سەبەبى، ءبىز ءارىسى - ءال-فارابي، اباي، ى.التىنسارين، ا.بايتۇرسىنۇلى، م.جۇماباەۆ، ج.ايماۋىتوۆ سەكىلدى كورنەكتى ويشىلداردىڭ، بەرىسى - ك.نۇرعاليەۆ، ك.ايتقاليەۆ، ك.بىتىباەۆا، ر.نۇرتازينا، م.تاسوۆا سەكىلدى ەلدىڭ قۇرمەتىنە بولەنگەن قايراتكەرلەردىڭ، اياگۇل ميرازوۆا، الينا سولوۆەۆا، الما شۇكىجانوۆا ىسپەتتى ەڭبەك ەرلەرىنىڭ جولىن لايىقتى جالعاستىرۋىمىز كەرەك.
قۇرمەتتى ۇستازدار! قۇرمەتتى ارىپتەستەر! سىزدەردى ءتول مەرەكەمىزبەن قۇتتىقتايمىن! سىزدەردىڭ قاجىرلى ەڭبەكتەرىڭىز بەن ءوز ىستەرىڭىزگە دەگەن ادالدىقتارىڭىز ءۇشىن شىنايى العىسىمدى بىلدىرەمىن. سىزدەردىڭ ارقالارىڭىزدا وقۋشىلارىمىز ءتۇرلى حالىقارالىق ءبىلىم دودالارىندا كوك بايراعىمىزدى جەڭىس تۇعىرىنان جەلبىرەتىپ كەلەدى. ەلىمىزدىڭ وسكەلەڭ ۇرپاعىنىڭ زياتكەرلىك الەۋەتىنە كۇللى الەم جوعارى باعا بەردى. تەك وسى جىلدىڭ وزىندە ءبىزدىڭ وقۋشىلارىمىز 58 التىن مەدال جەڭىپ الىپ، روبوتوتەحنيكادان الەمنىڭ ءۇش دۇركىن، حيميادان ەكى دۇركىن چەمپيونى اتاندى. سىزدەردىڭ دەندەرىڭىزگە ساۋلىق، سارقىلماس قۋات، قىزمەتتە تابىستى بولىپ، ابىروي بيىگىنەن كورىنۋلەرىڭىزدى تىلەيمىن!” - دەدى مينيستر ءوز قۇتتىقتاۋىندا.
