29 قىركۇيەك كۇنى تاجىك وپپوزيتسياسىنىڭ ەۋروپاداعى وكىلدەرى بەرليندە اكتسياعا شىققان سوڭ تاجىكستان قاۋىپسىزدىك ورگاندارى ولاردىڭ تۋىستارىن قاماۋعا الىپ، تەرگەگەن. وپپوزيتسيا بەلسەندىلەرى ورتالىق ازيا رەسپۋبليكالارىنىڭ باسشىلارى بەرلينگە كەلگەندە اكتسيا وتكىزىپ، تاجىكستان پرەزيدەنتى ەمومالي راحموننىڭ رەجيمىنە قارسى ۇران كوتەرىپ، كورتەجىنە جۇمىرتقا لاقتىرعان. بۇل تۋرالى “وزودي” راديوسى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ەۋروپادا تۇراتىن بەلسەندى شاروفيددين گادوەۆتىڭ 74 جاستاعى اناسىن جەكسەنبى كۇنى تاڭەرتەڭ حاتلون وبلىسىنىڭ قاۋىپسىزدىك قىزمەتكەرلەرى ۇيىنەن الىپ كەتكەن.
انامدى اكەتكەندە بالاڭ نەگە تىنىش جۇرمەيدى، پرەزيدەنتتىڭ ماشينەسىنە نەگە جۇمىرتقا لاقتىرادى، دەپ سۇراعان دەيدى گادوەۆ.
تاعى ءبىر بەلسەندى فارحود وديناەۆ گيسسار قالاسىنداعى نەمەرە ءىنىسىن پوليتسيا اكەتكەن، سول كۇيى حابار بولماعان.
اۋەلى كارى انامدى اكەتكىلەرى كەلگەن، بىراق ىنىممەن توقتاپتى. مەنىڭ دە اناما بالاڭ پرەزيدەنتكە نەگە جۇمىرتقا لاقتىرادى دەگەن سۇراق قويعان، - دەيدى وديناەۆ.
سونداي-اق، تاجىكستان سوتى "ەكسترەميستىك ۇيىم" دەپ تىيىم سالعان "توپ 24" وپپوزيتسيالىق ۇيىمى بەرليندە اكتسياعا قاتىسقانداردىڭ كەمىندە بەسەۋىنىڭ تۋىستارى تاجىكستاندا قامالعانىن حابارلاعان.
