قوستاناي وبلىسى اۋليەكول اۋدانىنداعى ءىرى ورمان ءورتى 10 قىركۇيەك كۇنى ساعات 10.00-دە تولىق ءسوندىرىلدى، - دەپ حابارلايدى "ادىرنا" ءتىلشىسى توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىك ءورتتىڭ حرونولوگياسىن ايتتى. ءورت 2 قىركۇيەك كۇنى ساعات 15.10-دا اۋليەكول اۋدانىنا قاراستى باسامان جانە سەميوزەرنىي ورمان شارۋاشىلىعى بولىمدەرىنىڭ اۋماقتارىندا باستالعان.
ءورت باستالعاننان بەرگى جالپى اۋماق 43 مىڭ گەكتاردى قۇرايدى. ءورت ەكى ەلدى مەكەندەگى 91 ءۇيدى شارپىدى جانە زاقىمدادى.
ەۆاكۋاتسيالانعاندار ۇيلەرىنە ورالدى، قالعاندارى تۋىستارىندا قالدى. ءورت باستالعاننان بەرى قۇتقارۋشىلار 2091 ادامدى قاۋىپسىز جەرگە كوشىردى.
ءورت كەزىندە 12 ادام دەنە جاراقاتىن العان، كۇيىك شالعان، جەڭىل جانە ورتاشا دارەجەدەگى ۋلانعان. زارداپ شەككەن 3 ادام اۋليەكول اۋداندىق اۋرۋحاناسىندا جاتىر.
امانقاراعاي اۋىلىنداعى ۇيىندىلەردى تالداۋ كەزىندە 1935 جىلى تۋعان ازاماتتىڭ ءمايىتى تابىلدى.
جەدەل شتاب جۇمىس ىستەي باستاعالى توتەنشە جاعدايلار مينيسترلىگىنىڭ سەنىم تەلەفونىنا 38 قوڭىراۋ تۇسكەن. 87 ازاماتقا كەڭەستىك-پسيحولوگيالىق كومەك كورسەتىلدى، 45 بالاعا توپتىق پسيحولوگيالىق جۇمىستار جۇرگىزىلدى.
اۋە تەحنيكالارىمەن ءورت سوندىرۋگە بارلىعى 327 سۋ توگۋ جۇمىستارى جۇرگىزىلدى.
ءورتتى سوندىرۋگە قاتىسقان كۇشتەر مەن قۇرالداردىڭ جالپى توپتاماسى 207 بىرلىك تەحنيكا مەن 1785 ادامدى قۇرادى.
باسامان جانە سەميوزەرنىي ورمان ورنالاستىرۋ بولىمشەلەرىنىڭ ورمان شارۋاشىلىعى كاسىپورىندارىنىڭ 73 ادامنان جانە 21 تەحنيكادان تۇراتىن كۇشتەرى مەن قۇرالدارى ورنىندا قالدى.
جەدەل شتاب ءوز جۇمىسىن اياقتادى.
"ادىرنا" ۇلتتىق پورتالى
