تۇركيا ىشكى ىستەر مينيسترلىگىنىڭ انكاراداعى باس قاۋىپسىزدىك باسقارماسىنىڭ قاقپاسىنىڭ الدىندا ەكى لاڭكەس جارىلىس جاسادى، دەپ حابارلايدى "ادىرنا" ءتىلشىسى انادولى اگەنتتىگىنە سىلتەمە جاساپ.
بۇل اقپاراتتى تۇركيانىڭ ىشكى ىستەر ءمينيسترى الي يەرليكايا راستادى.
انكارا ورتالىعىنداعى تۇركيا ىشكى ىستەر مينيسترلىگى عيماراتىنىڭ جانىندا جارىلىس بولدى. وقيعا ورنىنا پرەزيدەنتتىڭ كۇزەت قىزمەتىنىڭ قىزمەتشىلەرى كەلىپ جەتكەن.
جارىلىس جەرگىلىكتى ۋاقىت بويىنشا تاڭعى ساعات 09:30-دا بولدى. پوليتسيانىڭ ەكى قىزمەتكەرى جەڭىل جاراقات العان.
"جەڭىل كوممەرتسيالىق كولىك مىنگەن ەكى لاڭكەس ىشكى ىستەر مينيسترلىگىنىڭ باس قاۋىپسىزدىك باسقارماسىنا كىرەتىن قاقپاعا كەلىپ، جارىلىس ۇيىمداستىرعان. بىرەۋى ءوزىن-ءوزى جارىپ جىبەردى. ەكىنشى لاڭكەستىڭ كوزى جويىلدى. اتىس كەزىندە ەكى قىزمەتكەرىمىز جەڭىل جاراقات الدى", - دەپ جازدى يەرليكايا الەۋمەتتىك جەلىدەگى پاراقشاسىندا.
سول ماڭدا قوزعالىستى شەكتەۋ ماقساتىندا كولىك جولدارى جابىلدى. جارىلىس تۇركيا استاناسىنىڭ شالعاي جاتقان اۋداندارىندا دا ەستىلگەن بولىپ شىقتى.
