تۇركىستان قالاسىندا قازاقستاننىڭ وزگە دە ايماقتارىنان جينالعان دەلەگاتتاردىڭ قاتىسۋىمەن يران، اۋعانسان، تۇركيا قازاقتارىنىڭ قۇرىلتايى ءوتتى. جيىن وسى ەلدەردەن كەلگەن قازاق كوشىنىڭ 30 جىلدىعىنا ارنالدى. بۇل تۋرالى “ادىرنا” ۇلتتىق پورتالى حابارلايدى.
قۇرىلتايعا جۇزدەگەن ادام قاتىسقان. قالا اكىمدىگىنەن وكىلدەر، اۋىل اقساقالدارى، يران، اۋعانستان، تۇركيادان كەلگەن بەلگىلى قازاق اعايىندار جينالعان.
جيىنعا قاتىسقان يراننان كوشىپ كەلگەن جۋرناليست ءجۇسىپ بوكەنۇلىنىڭ ايتۋىنشا، قۇرىلتايدىڭ جاستارعا بەرەر ءتالىمى مول.
“قۇرىلتايدىڭ نەگىزى ماقساتى - سالت-ءداستۇرىمىزدى دارىپتەپ، ارتىق جەرلەرىن وزگەرتۋ. ماسەلەن، ارامىزداعى جاپ-جاس جىگىت پەن قىزدار ەكونوميكالىق جاعداي قيىن بولعان سوڭ ۇيلەنە الماي، قىزدارىمىز باسقا ۇلتقا شىعىپ، جىگىتتەرىمىز باسقا ۇلتتىڭ قىزىن الىپ وتىر. ءبىزدىڭ سالتىمىزعا قاتىستى ءبىراز قيىندىقتار بار. سولاردى وزگەرتۋىمىز كەرەك. اقشانى كوپ تالاپ ەتەتىن جاعدايلار دا كەزدەسەدى. سوندىقتان قازاقى سالت-ءداستۇردى بۇگىنگى ۇرپاققا دۇرىس دارىپتەۋ نيەتىمەن وسى قۇرىلتاي ۇيىمداستىرىلىپ وتىر.
ءۇش ەلدەن كوشىپ كەلگەن قازاقتارعا قازاقستاننىڭ زاڭىنا قۇرمەت كورسەتۋ، قازاقستاننىڭ جاقسى ازاماتى بولۋعا، قازاقستانعا ەڭبەۋك سىڭىرۋگە كومەكتەسكىمىز كەلەدى. سونداي-اق، قۇرىلتايدا ولارعا ارنالعان ءتيىمدى باعدارلامالار تۋرالى دا ايتىلدى. الداعى ۋاقىتتا ناتيجەسىن بەرەدى دەگەن سەنىمدەمىز”، - دەدى ءجۇسىپ بوكەنۇلى.
