تۇركيانىڭ كونيا پروۆينتسياسىندا ءۇش قاباتتى تۇرعىن ءۇي وپىرىلىپ، ادامدار ءۇيىندى استىندا قالدى، دەپ حابارلايدى “ادىرنا” ۇلتتىق پورتالى TRT Haber ارناسىنا سىلتەمە جاساپ.
وقيعا سەلجۇكلى اۋدانىنداعى بەيشەحير كوشەسىندە ورىن العان.
كۋاگەرلەردىڭ ايتۋىنشا، عيمارات كۇتپەگەن جەردەن وپىرىلعان. قازىرگى ۋاقىتتا وقيعا ورنىندا تابيعي اپاتتاردى باسقارۋ اگەنتتىگى، توتەنشە جاعدايلار قىزمەتى جانە پوليتسيا وكىلدەرى جۇمىس ىستەپ جاتىر.
كونيا گۋبەرناتورى يبراگيم اكىننىڭ مالىمەتىنشە، عيماراتتان شىققان ەكى تۇرعىن وزدەرىنىڭ بەس تۋىسىنىڭ ءۇيىندى استىندا قالعانىن حابارلاعان. قۇتقارۋشىلار قازىر قيراندىلار استىنان تۇرعىنداردى ىزدەستىرۋدە.
وقيعا ورنىنا جەدەل تۇردە 200 قۇتقارۋشى جۇمىلدىرىلدى. قازىرگى تاڭدا ءۇيىندى استىنان ءۇشىنشى ادام امان-ەسەن شىعارىلعانى بەلگىلى بولدى. كونيا پروكۋراتۋراسى بۇل جاعدايعا بايلانىستى تەرگەۋدى باستادى.
وقيعانىڭ ناقتى سەبەبى ازىرگە بەلگىسىز. كوپقاباتتى ءۇيدىڭ قۇلاعان ءساتى ۆيدەوعا ءتۇسىپ قالعان.
ايتا كەتەيىك، بۇل تۇركيادا سوڭعى كۇندەرى بولعان جالعىز توتەنشە جاعداي ەمەس. بۇعان دەيىن بولۋ پروۆينتسياسىنداعى تاۋ شاڭعىسى كۋرورتىندا بولعان ورتتەن 76 ادام قازا تاپقانى حابارلانعان ەدى.
