الماتىدا ورتتەن زارداپ شەككەن اقكەنت ىقشاماۋدانىنداعى 54-ءشى ءۇيدىڭ تۇرعىندارى ۇيلەرىنە ورنالاستى، دەپ حابارلايدى «ادىرنا» ۇلتتىق پورتالى.
بەلگىلى بولعانداي، قالپىنا كەلتىرۋ جۇمىستارى ۋاقىتىندا جۇرگىزىلگەن. پاتەرلەردىڭ كىرەبەرىسى، بوياۋى، تۇسقاعازى، ەسىكتەرى مەن تەرەزەلەرى جاڭارتىلعان. سونداي-اق الاتاۋ اۋدانىنىڭ اكىمى ازامات قالدىبەكوۆتىڭ سوزىنشە، كابەلدىك سىمدار مەن ەسەپتەگىشتەر جاڭالانعان.
«1 تامىزدا ءورت شىققان ۋاقىتتان باستاپ، تۇرعىنداردىڭ قاۋىپسىزدىگىنە جاۋاپتى بولدىق. اكىمدىك بارلىق تۇرعىندارعا قالپىنا كەلتىرۋ جۇمىستارى اياقتالعانعا دەيىن تۇرعىن ءۇيدى جالعا الۋعا قاراجات تولەيدى دەپ ۋادە بەردىك. ۋادەمىزدى ورىندادىق. بالالاردى مەكتەپكە جانە مەكتەپكە دەيىنگى مەكەمەلەرگە ورنالاستىرۋعا كومەك كورسەتىلدى. 30 قىركۇيەككە قاراي بارلىق تۇرعىندار پاتەرلەرىنە ورالدى. سونداي-اق اقكەنت ىقشاماۋدانىنداعى بارلىق تۇرعىن ۇيلەردىڭ ورتكە قاۋىپسىزدىگى تەكسەرۋدەن ءوتتى»، - دەدى اكىم.
جوندەۋ جۇمىستارىن «بولاشاق قۇرىلىس» جشس جۇرگىزگەن. الاتاۋ اۋدانى بويىنشا تج باسقارماسىنىڭ باستىعى، مايور عالىمحان مۇحامەدجان اقكەنتتە جوسپاردان تىس 16 جانە 9 قاباتتى 56 ءۇي تەكسەرىلگەنىن ايتتى.
«ءبىر كۇندە ۇيىمىزدەن ايىرىلدىق. دەگەنمەن ەل بولىپ بۇل قيىندىقتى دا ارتتا قالدىردىق. وسى رەتتە اكىمدىك پەن مەن قالا بيلىگىنە پاتەرلەر مەن بۇكىل ءۇيدى جوندەگەنى ءۇشىن، سونداي-اق قالپىنا كەلتىرۋ كەزەڭىندە ۋاقىتشا باسپانا بەرگەنى ءۇشىن العىس ايتامىز. باسپانامىز قايتا قالپىنا كەلتىرىلدى. بارلىق تۇرعىندار قۋانىشتى ءارى باقىتتى»، - دەيدى اقكەنت تۇرعىنى تىلەۋجان احمەتحانوۆ.
ەستەرىڭىزگە سالايىق، الماتىدا 1 تامىز كۇنى 16 قاباتتى تۇرعىن ءۇي كەشەنىندە ءورت شىققان. ورتتەن قاشقان تۇرعىندار پاتەرلەرىنىڭ تەرەزەلەرىنەن سەكىرىپ، بالالارىن سىرتقا لاقتىرعانىن جازعان ەدىك.
«ادىرنا» ۇلتتىق پورتالى
