Almatyda órtten zardap shekken Aqkent yqshamaýdanyndaǵy 54-shi úıdiń turǵyndary úılerine ornalasty, dep habarlaıdy «Adyrna» ulttyq portaly.
Belgili bolǵandaı, qalpyna keltirý jumystary ýaqytynda júrgizilgen. Páterlerdiń kireberisi, boıaýy, tusqaǵazy, esikteri men terezeleri jańartylǵan. Sondaı-aq Alataý aýdanynyń ákimi Azamat Qaldybekovtiń sózinshe, kabeldik symdar men eseptegishter jańalanǵan.
«1 tamyzda órt shyqqan ýaqyttan bastap, turǵyndardyń qaýipsizdigine jaýapty boldyq. Ákimdik barlyq turǵyndarǵa qalpyna keltirý jumystary aıaqtalǵanǵa deıin turǵyn úıdi jalǵa alýǵa qarajat tóleıdi dep ýáde berdik. Ýádemizdi oryndadyq. Balalardy mektepke jáne mektepke deıingi mekemelerge ornalastyrýǵa kómek kórsetildi. 30 qyrkúıekke qaraı barlyq turǵyndar páterlerine oraldy. Sondaı-aq Aqkent yqshamaýdanyndaǵy barlyq turǵyn úılerdiń órtke qaýipsizdigi tekserýden ótti», - dedi ákim.
Jóndeý jumystaryn «Bolashaq qurylys» JShS júrgizgen. Alataý aýdany boıynsha TJ basqarmasynyń bastyǵy, maıor Ǵalymhan Muhamedjan Aqkentte jospardan tys 16 jáne 9 qabatty 56 úı tekserilgenin aıtty.
«Bir kúnde úıimizden aıyryldyq. Degenmen el bolyp bul qıyndyqty da artta qaldyrdyq. Osy rette ákimdik pen men qala bıligine páterler men búkil úıdi jóndegeni úshin, sondaı-aq qalpyna keltirý kezeńinde ýaqytsha baspana bergeni úshin alǵys aıtamyz. Baspanamyz qaıta qalpyna keltirildi. Barlyq turǵyndar qýanyshty ári baqytty», - deıdi Aqkent turǵyny Tileýjan Ahmethanov.
Esterińizge salaıyq, Almatyda 1 tamyz kúni 16 qabatty turǵyn úı kesheninde órt shyqqan. Órtten qashqan turǵyndar páterleriniń terezelerinen sekirip, balalaryn syrtqa laqtyrǵanyn jazǵan edik.
«Adyrna» ulttyq portaly
