«زاڭ مەن ءتارتىپ» رەسپۋبليكالىق اكتسياسى اياسىندا قازاقستاندا العاش رەت قۇقىقبۇزۋشىلىقتاردىڭ الدىن الۋ ماسەلەسىنە ارنالعان «Kazakhstan Prevention Days» اتتى اۋقىمدى كورمە ۇيىمداستىرىلدى. اتالعان ءىس-شارانىڭ نەگىزگى ماقساتى – قۇقىقبۇزۋشىلىقتىڭ الدىن الۋعا باعىتتالعان ءتيىمدى مەحانيزمدەردى كوپشىلىككە تانىستىرۋ، سونداي-اق وتاندىق جانە شەتەلدىك وزىق تاجىريبەلەردى بىرىكتىرۋ ارقىلى قوعامداعى قاۋىپسىزدىك دەڭگەيىن ارتتىرۋ بولدى.
كورمەگە الماتى قالاسى ادىلەت دەپارتامەنتىنىڭ باسشىسى بالايم تۋعانبايقىزى كەسەباەۆا، سونداي-اق قۇقىق قورعاۋ ورگاندارىنىڭ، مەملەكەتتىك قۇرىلىمداردىڭ، ءبىلىم بەرۋ مەكەمەلەرىنىڭ جانە ازاماتتىق قوعام وكىلدەرى قاتىستى. ءىس-شارا بارىسىندا قاتىسۋشىلار قۇقىقتىق مادەنيەتتى قالىپتاستىرۋ، زاڭ ۇستەمدىگىن قامتاماسىز ەتۋ جانە ازاماتتاردىڭ قۇقىقتىق ساناسىن ارتتىرۋ ماسەلەلەرىنىڭ ماڭىزدىلىعىنا ەرەكشە توقتالدى. سونىمەن قاتار مەملەكەت پەن قوعام اراسىنداعى ءوزارا سەنىمدى نىعايتۋ قۇقىقبۇزۋشىلىقتاردىڭ الدىن الۋداعى نەگىزگى فاكتورلاردىڭ ءبىرى ەكەنى اتاپ ءوتىلدى.
كورمە اياسىندا قۇقىقبۇزۋشىلىقتاردىڭ الدىن الۋ، قوعامدىق ءتارتىپتى ساقتاۋ، جاستار اراسىندا قۇقىقتىق ساۋاتتىلىقتى ارتتىرۋ جانە الەۋمەتتىك قاۋىپسىزدىكتى قامتاماسىز ەتۋگە باعىتتالعان 45 جوبا ۇسىنىلدى. ۇسىنىلعان جوبالاردا زاماناۋي تەحنولوگيالاردى قولدانۋ، پروفيلاكتيكالىق جۇمىستاردى جەتىلدىرۋ، تاۋەكەل توپتارىمەن جۇيەلى جۇمىس جۇرگىزۋ جانە قوعاممەن كەرى بايلانىستى كۇشەيتۋ باعىتتارى قامتىلدى. بۇل باستامالار قۇقىق قورعاۋ سالاسىنداعى يننوۆاتسيالىق تاسىلدەردىڭ ماڭىزىن كورسەتىپ، الدىن الۋ شارالارىنىڭ تيىمدىلىگىن ارتتىرۋعا باعىتتالدى.
سونداي-اق كورمە بارىسىندا جوعارى وقۋ ورىندارىنىڭ ستۋدەنتتەرى وزدەرىنىڭ عىلىمي-زەرتتەۋ جانە پراكتيكالىق جوبالارىن تانىستىرىپ، ولاردىڭ جۇزەگە اسىرىلۋ بارىسى تۋرالى اقپارات بەردى. جاستار قۇقىقتىق سانا قالىپتاستىرۋ، الدىن الۋ شارالارىن جەتىلدىرۋ جانە قوعامداعى قۇقىقبۇزۋشىلىق دەڭگەيىن تومەندەتۋ بويىنشا ءوز ۇسىنىستارى مەن تىڭ يدەيالارىن ورتاعا سالدى. بۇل ستۋدەنتتەردىڭ ازاماتتىق بەلسەندىلىگىن ارتتىرىپ، قۇقىقتىق مادەنيەتتى دامىتۋعا قوسقان ۇلەسىنىڭ ايقىن كورىنىسى بولدى.
جالپى العاندا، «Kazakhstan Prevention Days» كورمەسى قۇقىقتىق مادەنيەتتى قالىپتاستىرۋعا، ازاماتتاردىڭ قۇقىقتىق ساۋاتتىلىعىن ارتتىرۋعا جانە قۇقىقبۇزۋشىلىقتاردىڭ الدىن الۋ سالاسىندا ءتيىمدى تاجىريبە الماسۋعا مۇمكىندىك بەرگەن ماڭىزدى الاڭ رەتىندە جوعارى باعالاندى. اتالعان ءىس-شارا قوعامدا زاڭ مەن ءتارتىپ قاعيداتتارىن نىعايتۋعا جانە قاۋىپسىز ورتا قالىپتاستىرۋعا باعىتتالعان ماڭىزدى قادام بولدى.
