بۇعان دەيىن ءتۇرلى باق بەتتەرىندە تالعار اۋدانى كەڭدالا اۋىلىنداعى كوپپاتەرلى تۇرعىن ۇيلەر قىستا جىلۋسىز قالۋى مۇمكىن دەگەن اقپارات تارادى.
وسى ماسەلەگە بايلانىستى بۇگىن اۋدان اكىمى تانات ايداربەكوۆتىڭ قاتىسۋىمەن ءباسپاسوز ءماسليحاتى ءوتتى. تىلشىلەر قاتىسقان جيىندا اكىم كەڭدالا اۋىلىندا بلوكتىق-مودۋلدىك قازاندىقتار (بمق) سالۋ ءۇشىن جوبالىق-سمەتالىق قۇجاتى دايىندالىپ جاتقانىن ايتتى.
اۋدان اكىمىنىڭ ايتۋىنشا، ازىرلەنەتىن جوبالاردىڭ جالپى سانى - 19. ونىڭ ىشىندە ا.ي. سمىكوۆ كوشەسىندەگى № 24, 49, 49ا، 53, 59 كوپپاتەرلى ۇيلەرگە گاز بەرۋ ءۇشىن بمق سالۋ دا بار. قاجەتتى قۇجات بيىل جەلتوقساندا جاسالىپ بىتەدى. جوبالاردىڭ بارلىعى بيۋدجەت ەسەبىنەن جۇزەگە اسىرىلماق. قۇرىلىس-مونتاج جۇمىستارى 2024 جىلدىڭ ناۋرىز ايىندا باستالادى دەپ جوسپارلانىپ وتىر.
"تالعار اۋدانى ورتالىقتاندىرىلعان جىلۋدان 1998 جىلى اجىراتىلعان. سول سەبەپتى كەي كوپپاتەرلى ۇيلەر كومىرمەن، ەلەكتر قۋاتى پەشىمەن جىلىتىلىپ كەلە جاتىر. 2018 جىلى تالعارعا گاز جۇيەسى كەلە باستادى. سول ۋاقىتتان بەرى بمق-لار سالۋ جۇمىستارى جۇرگىزىلىپ جاتىر. بىراق، ارادا بەلگىلى سەبەپتەرمەن ۇزىلىستەر بولعان", - دەدى اكىم.
سونداي-اق اكىم تۇرعىندار شاعىمدانعان سوڭ اكىمدىك ماماندارى كەڭدالا اۋىلىنا بارعانىن دا اتاپ ءوتتى. كەزدەسۋدە تۇسىندىرمە جۇمىستارى جۇرگىزىلىپ، ماماندار ۇيلەردى ارالاپ شىققان. ناتيجەسىندە كەي پاتەرلەردە پەش جوق ەكەنى انىقتالعان.
"تۇرعىنداردىڭ كەيبىرى بيىل گازعا قوسىلامىز دەپ پەشتەرىن العىزىپ تاستاعان. ءبىز ولارعا دەمەۋشىلەر ەسەبىنەن كومەك كورسەتەمىز", - دەدى تانات ايداربەكوۆ.
ايتا كەتەيىك، تالعار قالاسىندا 33, بەساعاش اۋىلىندا 2 بلوكتىق-مودۋلدىك قازاندىق بار.