Buǵan deıin túrli BAQ betterinde Talǵar aýdany Keńdala aýylyndaǵy kóppáterli turǵyn úıler qysta jylýsyz qalýy múmkin degen aqparat tarady.
Osy máselege baılanysty búgin aýdan ákimi Tanat Aıdarbekovtiń qatysýymen baspasóz máslıhaty ótti. Tilshiler qatysqan jıynda ákim Keńdala aýylynda bloktyq-modýldik qazandyqtar (BMQ) salý úshin jobalyq-smetalyq qujaty daıyndalyp jatqanyn aıtty.
Aýdan ákiminiń aıtýynsha, ázirlenetin jobalardyń jalpy sany - 19. Onyń ishinde A.I. Smykov kóshesindegi № 24, 49, 49a, 53, 59 kóppáterli úılerge gaz berý úshin BMQ salý da bar. Qajetti qujat bıyl jeltoqsanda jasalyp bitedi. Jobalardyń barlyǵy bıýdjet esebinen júzege asyrylmaq. Qurylys-montaj jumystary 2024 jyldyń naýryz aıynda bastalady dep josparlanyp otyr.
"Talǵar aýdany ortalyqtandyrylǵan jylýdan 1998 jyly ajyratylǵan. Sol sebepti keı kóppáterli úıler kómirmen, elektr qýaty peshimen jylytylyp kele jatyr. 2018 jyly Talǵarǵa gaz júıesi kele bastady. Sol ýaqyttan beri BMQ-lar salý jumystary júrgizilip jatyr. Biraq, arada belgili sebeptermen úzilister bolǵan", - dedi ákim.
Sondaı-aq ákim turǵyndar shaǵymdanǵan soń ákimdik mamandary Keńdala aýylyna barǵanyn da atap ótti. Kezdesýde túsindirme jumystary júrgizilip, mamandar úılerdi aralap shyqqan. Nátıjesinde keı páterlerde pesh joq ekeni anyqtalǵan.
"Turǵyndardyń keıbiri bıyl gazǵa qosylamyz dep peshterin alǵyzyp tastaǵan. Biz olarǵa demeýshiler esebinen kómek kórsetemiz", - dedi Tanat Aıdarbekov.
Aıta keteıik, Talǵar qalasynda 33, Besaǵash aýylynda 2 bloktyq-modýldik qazandyq bar.
