قازاقستان پروكۋراتۋراسى زاڭسىز ميتينگىگە شىققاندار "قاتاڭ جازالاناتىنىن" ەسكەرتتى

پروكۋراتۋرا ۇندەۋىندە "الەۋمەتتىك جەلىلەر مەن مەسسەندجەرلەردە ەرتەڭ، 9 مامىردا زاڭسىز ميتينگىگە قاتىسۋعا ۇگىتتەۋ ءجۇرىپ جاتقانىن" ايتادى. بىراق ۆەدومستۆو نارازىلىق بىلدىرۋگە ناقتى كىمنىڭ شاقىرىپ جاتقانىن كورسەتپەگەن.

"قۇقىق بۇزۋشىلىققا كىنالىلەر زاڭ الدىندا قاتاڭ جاۋاپ بەرەدى. قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋ، سونداي-اق ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا باس پروكۋراتۋرا ارانداتۋشىلىققا ەرمەۋگە جانە مەملەكەت زاڭدارىن بۇزباۋعا شاقىرادى" دەپ جازىلعان ۇندەۋدە.

ۇندەۋ نۇر-سۇلتان ەلدە تىيىم سالعان "قازاقستاننىڭ دەموكراتيالىق تاڭداۋى" قوزعالىسىنىڭ جەتەكشىسى، قۋعىنداعى بانكير مۇحتار ءابليازوۆ 9 مامىردا ازاماتتاردى بىرنەشە قالادا ميتينگىگە شىعۋعا شاقىرعان سوڭ جاريالاندى.

پروكۋراتۋرا بۇدان بۇرىن دا زاڭسىز ميتينگىگە شىقپاۋعا شاقىرعانىن ەسكەرتكەنىن، الايدا "كەيبىر ازاماتتار ورگانداردىڭ ەسكەرتۋىن ەلەمەي، زاڭسىز ميتينگىلەرگە شىعىپ، اكىمشىلىك جاۋاپتىلىققا تارتىلعانىن" ايتادى.

ۆەدومستۆو 1 مامىردا نارازىلىققا شىققاندار "ازاماتتاردىڭ دەمالۋىنا جانە تىنىشتىعىنا قاۋىپ ءتوندىردى" دەپ جازادى.

6 مامىردا قازاقستان ىشكى ىستەر مينيسترلىگى 6-12 مامىردا ىشكى ىستەر ورگاندارىنىڭ جەكە قۇرامى كۇشەيتىلگەن جۇمىس رەجيمىنە كوشەتىنىن حابارلاعان. مينيسترلىك قوعامدىق ءتارتىپتى بۇزۋ، شارالاردىڭ وتۋىنە كەدەرگى كەلتىرۋ فاكتىلەرى بولسا، پوليتسيا زاڭعا ساي جەدەل ارەكەت ەتەتىنىن ەسكەرتكەن.

1 مامىردا قازاقستاننىڭ بىرنەشە قالاسىندا بيلىككە قارسى نارازىلىق شاراسى ءوتتى. نارازىلار ء"بىزدىڭ ءوز تاڭداۋىمىز بار!", "توقاەۆ ءبىزدىڭ پرەزيدەنت ەمەس!", "داريعا سپيكەر ەمەس!", "نۇر-سۇلتان استانامىز ەمەس!", "اەس-كە قارسىمىز!", "حالىق پىكىرىمەن ساناسىڭىزدار", "كوپ بالالى انالارعا جاردەم بەرىلسىن!", "شىندىقتان قاشىپ قۇتىلمايسىڭ!", "شال، كەت!" دەپ ايقايلادى.

ىشكى ىستەر مينيسترلىگى 1 مامىردا نۇر-سۇلتان مەن الماتىدا شامامەن 80 ادامنىڭ ۇستالعانىن حابارلادى. الايدا جالپى قانشا ادامنىڭ اكىمشىلىك جاۋاپقا تارتىلعانى تۋرالى دەرەك جوق. 2 مامىردان بەرى نارازىلىققا شىققان ونداعان ازامات اكىمشىلىك جازاعا تارتىلدى.

"ازاتتىق" راديوسى