مۇسىلماندارعا قاسيەتتى ايدا قىسىم ارتقان
كورشىلەس قىتاي ەلىندەگى مۇسىلماندارعا كورسەتىلىپ جاتقان قىسىمدار جايلى سان مارتە ايتىلىپ تا، جازىلىپ تا ءجۇر. جەرگىلىكتى ءباسپاسوز باسىلىمدارىمەن قاتار، الەمدىك باق-تار دا بۇل تاقىرىپتارعا بىرنەشە ماقالالارىن ارقاۋ ەتتى. بىراق ودان قىتايداعى مۇسىلمانداردىڭ جاعدايى جاقسارىپ كەتتى دەپ ايتا المايمىز.
بىرنەشە جىل قاتارىنان قىتاي بيلىگى مۇسىلمانداردىڭ ءدىني جورالعىلارىن ۇستانۋعا كەدەرگى جاساپ، ءتۇرلى زاڭدارمەن تىيىم سالۋدا. وسىعان دەيىن مەشىتتەردى بۇزىپ، قاسيەتتى قۇراندى ورتەگەن ورتالىق بيلىك، مىنە بەس جىل قاتارىنان رامازان ايىندا قىسىمنىڭ نەبىر ءتۇرىن ارتتىرۋدا. ولار مۇسىلماندار ورازا ۇستاماۋى ءۇشىن ءتۇرلى قۇيتىرقىلىققا بارۋدا.
اتاپ ايتاتىن بولساق، ولار رامازان ايىندا ارنايى جالپىعا ورتاق تۇسكى اس ءىشۋدى مىندەتتەگەن. تۇسكى اس ىشۋدەن باس تارتقان جان جاۋاپكەرشىلىككە تارتىلىپ، ءتىپتى «تاربيەلەۋ لاگەرلەرىنە» دە اتتاندىرىلماق. تۇسكى اسقا سونىمەن قاتار يسلام دىنىندە حارام سانالاتىن شوشقا ەتى قوسىلىپ، سۋسىن رەتىندە الكوگولدى ىشىمدىكتەر قويىلماق. مۇنداي تاجىريبە 2015 جىلدان باستاپ جۇزەگە اسۋدا. بۇل اقپاراتتاردى حالىقارالىق ءدىني بوستاندىق جونىندەگى كوميسسيا (USCIRF) وكىلدەرى حابارلادى. ال حالىقارالىق ۇيعىر كونگرەسسىنىڭ مۇشەلەرى، تاڭعى ۋاقىتتا «بيلىك ءۇشىن» دەگەن ۇرانمەن ءبىر ستاكان ىشىمدىك ءىشۋ دە بىرنەشە جىل قاتارىنان جۇزەگە اسۋدا ەكەنىن حاباردار ەتتى. «اتالمىش قىسىمداردىڭ بارلىعى مۇسىلمانداردىڭ ءدىني بوستاندىعىنا كەدەرگى كەلتىرىپ، ولاردى ءتۇرلى كۇيزەلىستەرگە تاپ قىلۋدا. مىسالى جاسىرىن تۇردە ورازا ۇستاۋ مەن قۇران وقۋ ادەتكە اينالعان»، — دەيدى كونگرەسس زەرتتتەۋشىسى اكبار احلاندي. قىسىمدار شۇار ايماعىندا اسا قارقىندى تۇردە جۇرۋدە دەيدى ولار.
بۇگىن.كز
