ماڭعىستاۋ وبلىسىنىڭ ورتالىعى اقتاۋ قالاسىندا اۋعانستانداعى ۇرىس كەزىندە قازا تاپقان ينتەرناتسيوناليست-جاۋىنگەرلەرىنىڭ قۇرمەتىنە ارنالىپ سالىنعان ەسكەرتكىشتى قايتا جاڭعىرتۋعا بيۋدجەتتەن 257 590 233.00 تەڭگە قارجى ءبولىندى، - دەپ حابارلايدى ادىرنا ۇلتتىق پورتالىنىڭ ءتىلشىسى goszakup.gov.kz/ سايتىنا سىلتەمە جاساپ.
سۋرەت: aktau-mangistau.kz
اقتاۋ قالاسىندا اۋعان سوعىسى اردەگەرلەرىنىڭ قۇرمەتىنە ارنالىپ 2005 جىلى ەسكەرتكىش ورناتىلعان. تەندەر تاقىرىبىندا «1979-1989 جىلدارى اۋعانستانداعى ۇرىس كەزىندە ماڭعىستاۋ وبلىسىنىڭ قازا تاپقان ينتەرناتسيوناليست-جاۋىنگەرلەرىنىڭ قۇرمەتىنە اقتاۋ قالاسىندا ەسكەرتكىشتى قايتا جاڭارتۋ» دەپ جازىلعان.
دەمەك، سۋرەتتەگى ەسكەرتكىشتى قايتا جاڭعىرتۋعا وبلىس قازىناسىنان 257 590 233.00 تەڭگە ءبولىنىپ وتىر دەگەن ءسوز. تەندەردى 11 قىركۇيەك كۇنى "ماڭعىستاۋ وبلىسىنىڭ قارجى باسقارماسى" مەملەكەتتىك مەكەمەسى جاريالاعان. جەڭىمپاز 26 قىركۇيەك كۇنى انىقتالادى.
سۋرەت: aktau-mangistau.kz
تەندەردىڭ تەحنيكالىق سيپاتتاماسىندا جەڭىمپاز وزىنە العان مىندەتتەمەلەردىڭ تولىق جانە تيەسىلى ورىندالۋىن قامتاماسىز ەتۋى، جۇمىستاردى ورىنداۋ كەزىندە قازاقستان اۋماعىندا قولدانىلاتىن تەحنيكالىق قاۋىپسىزدىك ەرەجەلەرىنىڭ تالاپتارىن قاتاڭ ساقتاۋى، جۇمىسشىلارى جەكە قورعانىس قۇرالدارىمەن قامتاماسىز ەتۋ كەرەكتىگى كورسەتىلگەن.
ارينە، 10 جىلعا سوزىلعان قاسىرەتكە تولى تاريحتى سانادان سىلىپ تاستاۋ مۇمكىن ەمەس. اۋعان سوعىسىندا قانشاما قازاق جاۋىنگەرى شەيىت كەتتى. دەسە دە، جاڭا قازاقستاننىڭ كەڭەستىك ءداۋىردىڭ ەڭ ادىلەتسىز سوعىسىن يدەولوگيالىق قۇرالعا اينالدىرۋى قانشالىقتى دۇرىس؟ ونسىز دا بار ەسكەرتكىشتى قايتا جاڭعىرتۋعا بيۋدجەتتەن 257 590 233.00 تەڭگە قارجى ءبولۋدىڭ قاجەتتىلىگى بار ما؟
ءبىزدى وسى سۇراق مازالايدى...
قانات بىرلىكۇلى
ادىرنا ۇلتتىق پورتالى
