9 مامىر – جەڭىس كۇنىنە وراي جەتىسۋ وبلىسىندا 150 ادامنان قۇرالعان حور سيمفونيالىق وركەستردىڭ سۇيەمەلدەۋىمەن «دەن پوبەدى» ءانىن قازاق جانە ورىس تىلدەرىندە ورىندادى. اتالعان مەرەكەلىك شارا تالدىقورعان قالاسىنىڭ ورتالىق الاڭىندا ءوتتى.
وڭىردە جەڭىس كۇنىنە ارنالعان مەرەكەلىك ءىس-شارالار تاڭەرتەڭ ەرتە باستالدى. ەڭ الدىمەن وبلىس اكىمى بەيبىت يساباەۆ وڭىردە تۇراتىن ۇلى وتان سوعىسىنىڭ كوزى ءتىرى جالعىز ارداگەرى، 102 جاستاعى ىسقاق قۇسايىنوۆتى ارنايى بارىپ قۇتتىقتاپ، مايدانگەرگە مەملەكەت باسشىسىنىڭ قۇتتىقتاۋ حاتىن تابىستادى.
ودان كەيىن بەيبىت يساباەۆ داڭق وبەليسكىسىنە گۇل شوقتارىن قويۋ راسىمىنە قاتىسىپ، ورتالىق الاڭدا وتكەن «ەر ەسىمى – ەل ەسىندە!» اتتى مەرەكەلىك ءىس-شارانى تاماشالادى.
داڭق وبەليسكىسى مەن ماڭگىلىك الاۋعا گۇل شوقتارىن قويۋ ءراسىمى قالالىق ورتالىق ساياباقتا ءوتتى. وعان ءوڭىر باسشىسىمەن بىرگە ارداگەرلەر، قۇقىق قورعاۋ ورگاندارى مەن اسكەري بولىمدەردىڭ وكىلدەرى، مەكتەپ وقۋشىلارى قاتىستى. الدىمەن سالتاناتتى تۇردە مەملەكەتتىك تۋ ورتاعا شىعارىلدى. اسكەري داڭق گيرليانداسى مەن گۇل شوقتارى قويىلىپ، قازا تاپقاندار رۋحى ءبىر مينۋت ۇنسىزدىكپەن جانە سالتاناتتى قارۋدان اسپانعا وق اتۋ راسىمىمەن ەسكە الىندى. مۇنان سوڭ مەملەكەتتىك گيمن ورىندالدى.
ورتالىق الاڭدا وتكەن «ەر ەسىمى – ەل ەسىندە!» مەرەكەلىك ءىس-شاراسى اياسىندا وبلىس اكىمى بەيبىت يساباەۆ «ۇرپاققا ۇران بولعان» تاقىرىبىنداعى باننەرمەن تانىستى. وندا جەتىسۋ وڭىرىنەن شىققان كەڭەس وداعى باتىرلارى مەن «داڭق» وردەنىنىڭ يەگەرلەرىنىڭ سۋرەتى قويىلىپ، ەسىمدەرى جازىلعان.
سونداي-اق تۇرعىندارعا ارداگەرلەردىڭ ەرلىگى مەن بەيبىتشىلىكتىڭ ماڭىزىن بەينەلەيتىن مەكتەپ وقۋشىلارىنىڭ سۋرەت كورمەسى ۇسىنىلدى. بۇدان بولەك، تالدىقورعان اسكەري گارنيزونى مەن پوليتسيا دەپارتامەنتىنىڭ تەحنيكالارى قويىلعان كورمە ۇيىمداستىرىلىپ، دالا اسحاناسى جۇمىس ىستەدى.
كوپشىلىك نازارىنا تەاترلاندىرىلعان قويىلىم ۇسىنىلىپ، وندا مايدانگەردىڭ ەستەلىكتەرى ارقىلى سوعىس جىلدارىنىڭ تاريحى باياندالدى. قويىلىمدا بۇگىنگى بەيبىت ءومىردىڭ قادىر-قاسيەتىنە ەرەكشە ءمان بەرىلدى.
مەرەكەلىك شارانىڭ سوڭى ونەر جۇلدىزدارى، شىعارماشىلىق ۇجىمدار، د. راقىشەۆ اتىنداعى وبلىستىق فيلارمونيا، كامەرالىق حور جانە وقۋشىلار سارايىنىڭ تاربيەلەنۋشىلەرىنەن قۇرالعان بالالار حورى، قازاقستان ەستراداسى جۇلدىزدارى قاتىسقان كونتسەرتتىك باعدارلامامەن قورىتىندىلاندى.
سونداي-اق بالالار بەيبىتشىلىكتىڭ سيمۆولى رەتىندە كوككە ءتىرى كوگەرشىندەردى ۇشىرىپ، ارداگەرلەرگە جىلى لەبىزدەر جازىلعان وريگامي كوگەرشىندەرىن سىيعا تارتتى.
مەرەكەگە كەلگەن قالا تۇرعىندارى مەن قوناقتارى دا پىكىر ءبولىستى.
– جەڭىس كۇنى – ۇلى مەرەكە. بۇگىنگى بەيبىت ومىرىمىزگە اتا-بابالارىمىزدىڭ ەرلىگى مەن باتىرلىعىنىڭ ارقاسىندا قول جەتكىزدىك. ءوزىم قازىر زەينەتكەرمىن، جاسىم 85-تە. ءومىر بويى ەڭبەك ەتتىم. بۇگىندە بالالارىمىزدىڭ ەركىن دە باقىتتى ءومىر ءسۇرىپ جاتقانىنا قۋانامىن. ەلىمىز امان، جۇرتىمىز تىنىش بولىپ، ءاردايىم گۇلدەنە بەرسىن. بارشاڭىزعا بەيبىت ءومىر، جاقسىلىق تىلەيمىن، – دەدى تالدىقورعاندىق ءابدىراسىل داۋتوۆ.
تەكەلى قالاسىنان كەلگەن وتباسى دا ىزگى تىلەگىن ءبىلدىردى:
– ءبىز بۇگىن تالدىقورعانعا ارنايى كەلىپ، باتىرلاردى ەسكە الىپ، داڭق مونۋمەنتىنە گۇل شوقتارىن قويدىق. ءبىزدىڭ ارعى اتالارىمىز سوعىسقا قاتىسقان. وتباسىمىزدا ولاردىڭ ەرلىگى تۋرالى ەستەلىكتەردى ءجيى ايتىپ، ەسىمىزدە ساقتايمىز. ولاردىڭ باتىرلىعى مەن قايسارلىعى بولماسا، بالكىم ءبىز دە بولماس پا ەدىك. باتىرلار مەن ارداگەرلەردىڭ بارىنە تاعزىم ەتەمىز. جەرلەستەرىمىزدى مەرەكەمەن قۇتتىقتاپ، بارشاسىنا اماندىق تىلەيمىن، – دەدى ناتاليا بلەحۋن.
– ءبىزدىڭ ارعى اتالارىمىز ەركىندىك، بەيبىتشىلىك پەن جارقىن بولاشاق ءۇشىن سوعىستى. ولار ءبىزدىڭ بۇگىنگى باقىتتى ءومىرىمىز ءۇشىن جانىن قيدى. سوندىقتان 9 مامىر – وتە ماڭىزدى ءارى جارقىن مەرەكە. بۇل كۇن بىزگە بەيبىت ءومىردىڭ قانشالىقتى قىمبات ەكەنىن ۇمىتپاۋعا كومەكتەسەدى، – دەدى ونىڭ 12 جاستاعى ۇلى، №8 ورتا مەكتەپ وقۋشىسى الەكسەي بلەحۋن.
بۇدان ءارى مەرەكەلىك ءىس-شارالار «تالدىقورعان» يپپودرومىندا جالعاسىن تاۋىپ، وندا وبلىس اكىمىنىڭ كۋبوگى ءۇشىن ۇلتتىق ات سپورتى تۇرلەرىنەن رەسپۋبليكالىق تۋرنير ۇيىمداستىرىلدى.
