Mańǵystaý oblysynyń ortalyǵy Aqtaý qalasynda Aýǵanstandaǵy urys kezinde qaza tapqan ınternaıonalıst-jaýyngerleriniń qurmetine arnalyp salynǵan eskertkishti qaıta jańǵyrtýǵa bıýdjetten 257 590 233.00 teńge qarjy bólindi, - dep habarlaıdy Adyrna ulttyq portalynyń tilshisi goszakup.gov.kz/ saıtyna silteme jasap.
sýret: aktau-mangistau.kz
Aqtaý qalasynda Aýǵan soǵysy ardegerleriniń qurmetine arnalyp 2005 jyly eskertkish ornatylǵan. Tender taqyrybynda «1979-1989 jyldary Aýǵanstandaǵy urys kezinde Mańǵystaý oblysynyń qaza tapqan ınternaıonalıst-jaýyngerleriniń qurmetine Aqtaý qalasynda eskertkishti qaıta jańartý» dep jazylǵan.
Demek, sýrettegi eskertkishti qaıta jańǵyrtýǵa oblys qazynasynan 257 590 233.00 teńge bólinip otyr degen sóz. Tenderdi 11 qyrkúıek kúni "Mańǵystaý oblysynyń qarjy basqarmasy" memlekettik mekemesi jarııalaǵan. Jeńimpaz 26 qyrkúıek kúni anyqtalady.
sýret: aktau-mangistau.kz
Tenderdiń tehnıkalyq sıpattamasynda jeńimpaz ózine alǵan mindettemelerdiń tolyq jáne tıesili oryndalýyn qamtamasyz etýi, jumystardy oryndaý kezinde Qazaqstan aýmaǵynda qoldanylatyn tehnıkalyq qaýipsizdik erejeleriniń talaptaryn qatań saqtaýy, jumysshylary jeke qorǵanys quraldarymen qamtamasyz etý kerektigi kórsetilgen.
Árıne, 10 jylǵa sozylǵan qasiretke toly tarıhty sanadan sylyp tastaý múmkin emes. Aýǵan soǵysynda qanshama qazaq jaýyngeri sheıit ketti. Dese de, Jańa Qazaqstannyń keńestik dáýirdiń eń ádiletsiz soǵysyn ıdeologııalyq quralǵa aınaldyrýy qanshalyqty durys? Onsyz da bar eskertkishti qaıta jańǵyrtýǵa bıýdjetten 257 590 233.00 teńge qarjy bólýdiń qajettiligi bar ma?
Bizdi osy suraq mazalaıdy...
Qanat Birlikuly
Adyrna ulttyq portaly
