سەمەي قالاسىندا شىرشانى بەزەندىرۋ كەزىندە جاراقات العان مۇعالىم اۋرۋحانادان شىقتى، دەپ حابارلايدى "ادىرنا" ۇلتتىق پورتالى.
وقۋ-اعارتۋ ءمينيسترى عاني بەيسەمباەۆ ۇكىمەتتەگى ءباسپاسوز كونفەرەنتسياسىندا وقيعا ءمان-جايىن تەكسەرۋ بارىسىندا جاۋاپتى تۇلعالار تارتىپتىك جازاعا تارتىلعانىن ايتتى.
"قالا اكىمىنىڭ ورىنباسارىنا ەسكەرتۋ بەرىلدى. ءبىلىم ءبولىمىنىڭ باسشىسى پەداگوگ مارتەبەسى تۋرالى زاڭدى ورىنداۋداعى نەمقۇرايدىلىعى ءۇشىن قىزمەتىنەن بوساتىلدى. ءۇش مەكتەپ ديرەكتورى دا تارتىپتىك جاۋاپكەرشىلىككە تارتىلدى", – دەدى عاني بەيسەمباەۆ.
مينيستر مۇعالىمگە وتەماقى تولەۋ ماسەلەسى شەشىلىپ جاتقانىن، سونداي-اق مۇعالىمنىڭ دەنساۋلىعىن قالپىنا كەلتىرۋگە ۇلكەن كوڭىل بولىنگەنىن اتاپ ءوتتى. عاني بەيسەمباەۆتىڭ ايتۋىنشا، مۇعالىمنىڭ جاعدايى جاقسى.
ء"بىزدىڭ مۇعالىمنىڭ دەنساۋلىعى ەرەكشە باقىلاۋعا الىندى. بۇگىن تاڭەرتەڭ ول اۋرۋحانادان ساۋ كۇيىندە شىقتى. سوندىقتان ارىپتەسىمىزدىڭ جۇمىس ورنىنا تولىق ورالۋى ءۇشىن ءارى قاراي كومەكتەسۋدى جالعاستىرامىز", – دەدى مينيستر.
عاني بەيسەمباەۆ مەملەكەتتىك ورگانداردىڭ ءبىلىم باسقارماسىنىڭ باسشىلىعى جانە اكىمنىڭ ورىنباسارلارىمەن شۇعىل كەڭەس وتكىزگەنىن، وسىنداي بۇزۋشىلىقتارعا جول بەرمەۋ ءۇشىن قوسىمشا شارالار قابىلدانعانىن ايتتى. سونىمەن قاتار، پەداگوگ مارتەبەسى تۋرالى زاڭ بۇزۋشىلىقتارعا مونيتورينگ جۇرگىزۋ تاپسىرىلدى.
ەسكە سالا كەتەيىك، جەلتوقسان ايىندا سەمەي قالاسىندا مۇعالىم جاڭا جىلدىق شىرشانى بەزەندىرۋ كەزىندە بيىكتىكتەن قۇلاپ، جاراقات العان ەدى.
