سوڭعى جىلدارى ەلىمىزدە ۇلكەن تەننيس قارقىندى دامىپ كەلەدى. سايىپقىراندارىمىز حالىقارالىق جارىستاردا ولجا سالىپ ءجۇر. سولاردىڭ ءبىرى – 14 جاسقا دەيىنگى قازاقستاننىڭ №1 راكەتكاسى زاڭعار نۇرلانۇلى. جاس تا بولسا تالانتىمەن تالايدى تاڭعالدىرىپ جۇرگەن سپورتشىنى تۇركىستان وبلىسىنىڭ اكىمى ومىرزاق شوكەەۆ ارنايى قابىلداپ، پىكىر الماستى. بۇل تۋرالى تۇركىستان وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
“ زاڭعار بالامىزدان ءۇمىتىمىز زور. كەزدەسۋدى ءجون كوردىم. جاپ-جاس بولسا دا، 13-14 جاسىندا ەلدىڭ اتىن شىعارىپ جاتىر. تۇركىستان وبلىسى ءۇشىن وسىنداي تالانتتاردىڭ ورنى بولەك. ەۋروپادا اتوي سالىپ ءجۇرسىڭ. تۇركىستاندىق بالالاردى سەن ارقىلى جىگەرلەندىرىپ، ۇلكەنن تەننيسكە قىزىقتىرۋ ءۇشىن ارنايى شاقىرىپ وتىرمىز”، – دەدى ومىرزاق شوكەەۆ.
ۇلكەن تەننيستەن 14 جاسقا دەيىنگى سپورتشىلار اراسىنداعى قازاقستاننىڭ ءبىرىنشى راكەتكاسى زاڭعار نۇرلانۇلى سلوۆاكيادا وتكەن Tennis Europe سەرياسىنىڭ Baseline Open U14 ەكىنشى ساناتتى ءتۋرنيرىنىڭ چەمپيونى اتانعان. ول فينالدا ەكى جارىم ساعاتقا سوزىلعان درامالىق باسەكەدە سلوۆەنيانىڭ 14 جاسقا دەيىنگى ءبىرىنشى راكەتكاسى زيگو سەشكونى 3:6, 6:2, 7:6 ەسەبىمەن جەڭدى. تۇركىستان وبلىسىنىڭ سپورتشىسى قازىر ەۋروپا رەيتينگىندە ۇزدىكتەر قاتارىندا تۇر. ۆەنگريا، فرانتسيا جانە وزگە دە مەملەكەتتەردەگى دودالاردا جەڭىسكە جەتكەن.
“ارمانىم قازاقستاننىڭ تۋىن جەلبىرەتىپ، ەلىمدى الەمگە تانىتۋ. ول ءۇشىن كوپ جۇمىس ىستەۋ، جاتتىعۋ كەرەك، – دەگەن زاڭعار نۇرلانۇلى ارنايى قابىلداپ، قۇرمەت كورسەتكەن ءوڭىر باسشىسىنا ريزاشىلىعىن ءبىلدىردى.
بۇگىن تۇركىستاندا حالىقارالىق تەننيس ورتالىعىنىڭ تەحنيكالىق اشىلۋى ءوتتى. مۇندا ۇلكەن تەننيسپەن شۇعىلدانۋعا بارلىق جاعداي جاسالعان.
”ادىرنا” ۇلتتىق پورتالى
