تەاتردا قولونەر تۋىندىلارىنىڭ جارمەڭكەسى ۇيىمداستىرىلدى.
الماتىدا قالا كۇنى قارساڭىندا جىرشى-تەرمەشىلەردىڭ فەستيۆالى ءوتتى. رەسپۋبليكالىق فەستيۆالگە ەلىمىزدىڭ وزگە وڭىرىنەن كەلگەن ونەر يەلەرى قاتىستى.
«بۇل ءان بۇرىنعى اننەن وزگەرەك». الاتاۋ ءداستۇرلى ونەر تەاترىندا ونەرپازدار قۇلاقتىڭ قۇرىشىن قاندىرىپ، دەلەبەنى قوزدىراتىن، بابادان جەتكەن جىرلاردى شىرقاپ، تەرەڭگە باۋليتىن تەرمەلەردى ورىندادى.
– ءبىز ءۇشىن جىر-تەرمەنىڭ ەل ىشىندە كەڭىنەن ناسيحاتتالۋى، جۇرتتىڭ جادىندا ساقتالۋى جانە كەلەشەك ۇرپاققا جەتۋى ماڭىزدى. بۇل – قازاققا عانا ءتان ونەر ەمەس، جالپى تۇركى حالقىنا ورتاق، الەم مويىنداعان مۇرا، – دەدى جىرشى، قازاقستاننىڭ ەڭبەك سىڭىرگەن قايراتكەرى ۇلجان بايبوسىنوۆا.
ۇلتتىق قۇندىلىقتى دارىپتەگەن كەشتە سىر ەلى مەن جەتىسۋدان، باتىس پەن ەلوردادان كەلگەن مىقتىلار دا ونەر كورسەتتى. ءبارى – شەتىنەن شەبەر، تىڭدارماننىڭ كوڭىلىن ءدوپ باسقان شايىر اقىندار.
– ءىس-شارا قالا كۇنىنە وراي ۇيىمداستىرىلىپ جاتىر. كەش ۇرپاق ساباقتاستىعىمەن ەرەكشەلەنىپ وتىر. ساحنادا اعالارمەن بىرگە جاس جىرشىلار دا ونەر كورسەتىپ جاتىر، – دەدى جىرشى، ءانشى شاتتىق ۋاتقان.
كەشكە كەلگەن كورەرمەن دە كوپ. سونداي-اق تەاتردا جارمەڭكە ۇيىمداستىرىلدى. كەلۋشىلەر قولونەر تۋىندىلارىمەن تانىستى.
اقپارات: «الماتى» تەلەارناسى
