قاسىم-جومارت توقاەۆ تاجىكستان پرەزيدەنتىنە قۇتتىقتاۋ جەدەلحاتىن جولدادى. مەملەكەت باسشىسى قاسىم-جومارت توقاەۆ پرەزيدەنت ەمومالي راحموندى جانە تاجىك حالقىن ۇلتتىق مەرەكەسى – تاۋەلسىزدىك كۇنىمەن قۇتتىقتادى، دەپ حابارلايدى "ادىرنا" ۇلتتىق پورتالى "اقورداعا" سىلتەمە كورسەتە وتىرىپ.
– قازاقستان مەن تاجىكستان اراسىنداعى جوعارى قارقىنمەن دامىپ كەلە جاتقان ىنتىماقتاستىق جاڭا ءمان-مازمۇنعا يە بولدى جانە بايلانىستارىمىز ستراتەگيالىق سەرىكتەستىك پەن وداقتاستىق دەڭگەيىنە تولىق ساي كەلەدى, – دەپ جازىلعان جەدەلحاتتا.
سونىمەن قاتار، مەملەكەت باسشىسى بىرلەسكەن كۇش-جىگەردىڭ ناتيجەسىندە قازاقستان مەن تاجىكستاننىڭ كوپجاقتى قارىم-قاتىناسى الداعى ۋاقىتتا ەكى ەلدىڭ يگىلىگى مەن مۇددەسى ءۇشىن نىعايا بەرەتىنىنە سەنىم ءبىلدىردى. ەمومالي راحموننىڭ جاۋاپتى مەملەكەتتىك قىزمەتىنە تابىس، ال باۋىرلاس تاجىكستان حالقىنا باق-بەرەكە تىلەدى.
ەستەرىڭىزگە سالا كەتەيىك، بۇعان دەيىن قاسىم-جومارت توقاەۆتىڭ شاقىرۋىمەن 2023 جىلى 25-26 تامىزدا تاجىكستان پرەزيدەنتى ەمومالي راحموننىڭ استاناعا جۇمىس ساپارىمەن ارنايى كەلدى. توقاەۆ استانا اۋەجايىندا راحموندى قارسى الدى. ەمومالي راحمون قازاقستان پرەزيدەنتىنە قوناقجايلىلىعى ءۇشىن ريزاشىلىعىن ءبىلدىردى. قوس ەلدىڭ پرەزيدەنتتەرى الدىمەن شاعىن قۇرامدا، ودان كەيىن كەڭەيتىلگەن قۇرامدا كەلىسسوزدەر جۇرگىزدى.
26 تامىزدا قاسىم-جومارت توقاەۆ پەن ەمومالي راحمون 2022 جىلى سالىنعان استانانىڭ باس مەشىتىنە باس سۇقتى. سونىمەن قاتار، قازاقستاندىقتاردىڭ ەرەكشە "ىقىلاسى اۋعان" تاۋارلار كورمەسىن اشىپ، تاجىكستان ونىمدەرىن تاماشالاعان ەدى.
"ادىرنا" ۇلتتىق پورتالى
