وبلىس ورتالىعىندا تۇركىستان وبلىسى مەن قىتاي حالىق رەسپۋبليكاسى كومپانيالارىنىڭ ونىمدەرى ۇسىنىلعان بىرلەسكەن كورمەسى ءوتىپ جاتىر. وعان تۇركىستان وبلىسىنىڭ اكىمى دارحان ساتىبالدى مەن قىتايدان ارنايى كەلگەن بىرنەشە ءىرى كاسىپورىن باسشىلارى قاتىستى. ايماققا ينۆەستيتسيا تارتىپ، جەرگىلىكتى ونىمدەردى ەكسپورتقا شىعارۋدى ماقسات ەتكەن ءىس-شارادا جالپى سانى 60-قا جۋىق تاۋار ءوندىرۋشىنىڭ ونىمدەرى قويىلدى. اتاپ ايتقاندا، كيىم، اياق كيىم، ىدىستار، تەكستيل ونىمدەرى، ەلەكتر ماشينالارى، كۇننەن قورعايتىن ونىمدەر، ەلەكتر سكۋتەرلەرى جانە تۇركىستان وبلىسى بويىنشا تاماق، جيھاز، حيميا، جەڭىل ونەركاسىپ ونىمدەرى ۇسىنىلدى.
- بۇل كورمەنىڭ تۇركىستان وبلىسىندا ءوتۋىنىڭ ماڭىزى جوعارى. وعان دالەل رەتىندە ەكى ەلدىڭ كوپتەگەن ورتاق باستامالارىن ايتۋعا بولادى. ساۋدا-ەكونوميكالىق جانە مادەني-گۋمانيتارلىق قاتىناستاردى دامىتۋ تۇرعىسىنان قىتاي حالىق رەسپۋبليكاسى تۇركىستان وبلىسىنىڭ ماڭىزدى جانە سەنىمدى سەرىكتەسى بولىپ تابىلادى. ءوزارا ىنتىماقتاستىقتىڭ ارقاسىندا ەكى ەل اراسىنداعى تاۋار اينالىمى ءوستى. تۇركىستان ءوڭىرى ەلىمىزدىڭ قارقىندى دامىپ كەلە جاتقان وڭىرلەردىڭ ءبىرى جانە وراسان زور ينۆەستيتسيالىق جانە تۋريستىك الەۋەتكە يە. مەملەكەتتەرىمىز اراسىنداعى ەكونوميكالىق بايلانىستاردى دامىتۋعا سەرپىن بەرەتىن ءوزارا ينۆەستيتسيانى ۇلعايتۋ ارقىلى ىنتىماقتاستىقتى ودان ءارى نىعايتۋعا شاقىرامىن. تاريحي ۇلى جىبەك جولىنىڭ جۇرەگىندە ورنالاسقان تۇركىستان وبلىسىندا قىتايلىق كومپانيالاردىڭ باستامالارىنا تولىق قولداۋ كورسەتىلەدى، - دەدى دارحان امانگەلدىۇلى.
ۇقساس جاڭالىقتار
